Ngi kyrmen ban jop baroh 18 ngut hynrei dei u paidbah ban rai : Ardent

Shillong, Rymphang 04: U President jong ka Voice of the Poeople Party (VPP) u Bah Ardent M Basaiawmoit ha ka sngi Saitjaiñ u la ong ba ka kumba ka party ka pynïakhun 18 ngut ki kyrtong ha kane ka elekshon ka jingkyrmen ruh ka don ba kin poi sha ka thong hynrei ka rai ba kut hi ka dei u paidbah uban rai ha ka 27 tarik bad ba ka resol kan sa paw ha ka 2 tarik Lber.
Haba ïakren sha ki lad pathai khubor, u Bah Ardent u la ong ba ka party kan nym kob ba kan jop katta katta seat hynrei kum ka party ka kyrmen pat ba kan jop ha baroh kiba ka pynïeng.
U la ïathuh ruh ba ka VPP kan sa pynmih ïa ka Vision Documents ha kine ki sngi kiban sa wan shuwa ba ka party kan pynlait ïa ka eleection manifesto.
“Ka Pule puthi, ka ïoh ka kot, ka koit ka khiah kan dei ka mat kaba ha khmat eh kaba kum ka party ka buh ha khmat,” u la ong.
U la ïathuh ruh ba ka ILP kan dei kawei na ki mat kaba ka party kan pynrung ha ka manifesto jong ka.
Haba ïadei bad ka jingkam u MLA ka Mawhati uba la kynriah noh sha Nongkrem ban aireng ha kane ka elekshon u Bah Dasakhiat Lamare ba ka dei ka jingkwah ki paidbah ba un wan ïakhun noh na Nongkrem hadien ba ki paidbah ki la jawdud ïa ki kam pynroi kiba u la wanrah sha Mawhati, “Ngam donkam ban ong eiei ïa kata kaba u kyrtong NPP na Nongkrem uba kynriah noh na Mawhati hynrei phi la ïohi ba u kyrtong ba ïakhun na ka NPP na katei ka constituency u ong ba ha Mawhati ym don kam pynroi satia katba u MLA ka Mawhati uba kynriah noh sha Nongkrem u kren da khongpong bad kane hi ka pyni ba wat na kawei ka ïing bad na kajuh ka party kumba la kam hi da u kyrtong na Nongkrem, ka mih ar tylli ka sur bad nga ngeit ba u paidbah u sngewthuh bad ngam donkam ban kynthoh eiei,” u la ong.
Haba ïakren bad u kyrtong ka VPP na Pynursla u Bah Manbhalang Thabah bad kylli ïa uno u kyrtong ba un hap ïakhun pyrshah, “Ka jingsahdien hi ka dei kaba ngan hap ïakhun pyrshah ym bad kino kino ki kyrtong,” u la jubab.
Haba kylli la u don jingkyrmen ne em ban pynliem kat ïa u Bah Prestone Tynsong u MLA ba la jop haduh 4 sien lynter u Bah Manbha u la ong, “Kumba ka VPP ka mih na bynta ban wanrah ïa ka jingkylla bad kumba ki paidbah ym tang na Pynursla ki kwah ïa ka jingkylla ngam artatien ba da ka jingstad ki paidbah kin ai ïa ka jubab ha ka 2 tarik,” u la jubab.
Haba kylli ïa ki kam kiba u Bah Prestone um lah ban pyndep u Bah Manbha u la ong ba kawei na ki mat kiba baroh ki sakhi ba wat la naduh u 2018 la sdang ïa ka Pynursla Civil- Subdivision hynrei ki kyrtong na Pynurlsa kim pat lah satia ban thep kyrteng ha Pynursla.
Shuh shuh haba ïakren bad u Prof Brightsterwell u kyrtong ka VPP na Mawlai u la ong ba ka jingïakhun kaba ka VPP ka shim jingkit khlieh ka dei halor ka pule puthi bad ka ïoh ka kot, ‘kumta ruh nag leit sha u paidbah ka Mawlai ban pynhsai halor kane ka mat.
Haba kylli halor ka jingtreikam ka pisa ha kane ka elekshon, “Ngim tip haduh katno ka treikam namar ngi te ngim ju pyndonkam pisa hynrei nga ïohsngew ba ka ïaid bha ka khana ba ka don kaba kum kata hynrei na ka liang jong nga bad ka party hi ngim salia ban ïakhun pyrshah ïa ka bor jong ka pisa,” ong u Prof Brightsterwell.
Na ka liang pat u Bah Adelbert Nongrum u kyrtong na North Shillong u la ong ba ka jingwan ki heh spah ban ïakhun na ka constituency jong u kan ym pynduh mynsiem satia ïa u namar ki paidbah ka North Shillong kin ym jied nongmih khmat da kaba pynshong dor ha ka pisa.
“Ngam don jingtieng ba ki heh spah ki ïakhun lelekshon namar ma ki te ki ïakhun da ka pisa hynrei nga te da ka ishu lada dei ba ki ïakhun da ka ishu lehse kan ïaid da kumwei pat,” u la ong.
“Nga la lah ban rah ha Assembly ïa ka mat pynjlan rta thep kam bad nga la lah ruh ban pynurlong ïa kane bad shibun ki mat kiba donkam ban ïakren na bynta ka jylla bad ka jaidbynriew hi baroh lada dei ïa u pud u sam, ka reservation policy bad kiba bun bah ki mat kiba dokam ïa ngi ka VPP ban leh bad nga sngewskhem ba ki paidbah ym tang na Nort Shillong hynrei na kiwei pat ki constituency kiba nga pynïeng kyrtong,” u la ong.
Shuh shuh haba ïakren bad kiwei pat ki kyrtong ba kynthup naduh u Bah Winstone Tonny Lyngdoh na Nongthymmai, u Bah Raja Jyrwa, U Avner Pariat na East Shillong,, Heaving Stone Kharpran na Mawryngkneng, u Bah Doristar Marbaniang na Mawphlang, u Bah Dany Langstieh na South Shillong ki la pynpaw ba kumbaka party ka ïeng ha ka nongrim ban pynim biang, ban pynbha biang bad ban pynkylla dur ïa ka jylla kumta ki kyrmen ba u paidbah un ai jingshaniah ha ka party ba ka kit ïa ka lyngkor na bynta ka jylla.