Thrang u Kpa ban pynsted ïa ka jingtohkit, lada ym sei soh kwah ban tohkit da ka CBI

Nongpoh, Jymmang 15: Ban pynioh ïa ka jingbishar kaba hok halor ka jngkhlad ba kyndit ka samla Walinda Binong kumba la kynnoh da ki bor pynïaid ka Mody University, Rajasthan ba ka la dih bih bad sdien phasi ïa lade, na ka liang u Kpa bad ka ïing ka sem haduh mynta kim lah satia ban pdiang ïa katei ka jingkynnoh bad ki thrang ba ki bor ba dei peit kin pynsted ïa ka jingtohkit khnang ban paw ki jingshisha bad ruh ban ioh ïa ka jingbishar kaba hok na ka bynta ka khun jong ki, kaba ki la duh noh khlem poi pyrkhat.
Kum ban pynkynmaw, u lyoh badum u la wan kah ïa ka ïing ka sem jong ka Walinda Binong ha ka 27 tarik u Ïaiong 2023, ha kaba ki la ioh pdiang ïa ka khubor ba ka khun jong ki, ka shitom jur bad haba la leit shatei ka skulbah kaba don ha Rajasthan ki la lap pynban ba ka khun ka la khlad noh da kaba kynnoh ba ka la dih bih bad sdien phasi ïa lade kumba la kynnoh da ki bor pynïaid ka Mody University, Rajasthan haba pynshai sha kiba haïng kane ka samla kaba pule ha ka ‘School of Design’ ha katei ka University.
Haba buddien halor kane ka jingkhlad kane ka samla ba kiba haïing hasem haduh mynta ki sah ha ka umdum, u nongthoh Khubor u la ioh ba ïa kren bad u kpa jong kane ka samla, u Bah Rubi Binong, u la ong ba kum ka ing ka sem ki da thrang bad angnud ba dei ban pynsted ïa kane ka jingtohkit khnang ban paw ki jingshisha.
U la ïathuh ruh haduh mynta kum ka ïing ka sem ka dang ai ka jingshaniah kaba pura ha ka jingtohkit jong ki Pulit Rajasthan bad ki Pulit ka Meghalaya ryngkat ka jingïatrei lang naduh ka Central Women Commission, State Women Commission bad ka tnad Social Welfare ba kum ka ïing ka sem ka khmih lynti ba kane ka ka jingtohkit kan long kaba khuid bad kaba jop ban tip ïa ka daw tynrai jong ka jingkhlad ba kyndit ka khun jongki.
“Ka ing ka sem hi kam lah ban pdiang ïa ka jingkynnoh ba ka dih bih ne sdien phasi ïa lade, namar ha ki por ba la leit noh ruh ka la don ka jingud na ka khun sha la u kpa ba ka don ka jingbym suidniew na ka liang ki bor pynïaid ka University bad hadien ba la jia pat kum kane ka jingjia ba sngewsih ki la kynnoh kylla ba ka khun jongki, ka dih bih bad sdien phasi ïa lade bad da lei lei kum ka ïing ka sem kam lah ban pdaing bad ki tip kham bha ïa ka jinglong jingman ka khun jongki ba kan nym shim ïa ka rai da ka lynti ban dih bih ne sdien phasi ïa lade” ong u Bah Rubi Binong, kpa jong ka samla Walinda Binong.
Shuh shuh, u la kren shai ruh haduh mynta kum ka ïing ka sem ka ai ka jingshaniah ba puara ïa ka jingtohkit ba la tohkit halor kane ka jingkhlad ka khun jongki kaba kim lah ban pdiang haduh kine ki khyllip mat bad lada dei ba ka jingtohkit kam long kaba sei soh kum ka ïing ka sem hi ka wah ban tohkit da ka CBI kaba long laitluid khnang ba kin paw ki jingsha ba kum ka ing ka sem ki suba ba don ei ei sha lyndei halor kane ka jingkhlad jong ka khun jong ki, la bynrap u Bah Rubi Binong.