Shillong, Jymmang, 15: Ki shipai BSF jong ka 193 Battalion ha ka sngi U Blei ki la ïoh ban kurup ïa ki jaiñ, kata, ki Saree, kiba shongdor palat T. 20 lak na khappud jong ka East Khasi Hills.
Ïa kine ki jaiñ la kurup da ki shipai BSF kiba ap pahara ha BOP Barmanbari katba ki snar nongkhaïi tuh ki dang pyrshang ban jam sha u pud u sam jong ka ri Bangladesh.
Hadien ka jingpynibor jong ki shipai BSF, ki snar khaïi tuh ki la phet krad ïalade bad iehnoh shadien ïa ki mar ba ki la kit da kaba shim kabu ïa ka jingrben jong ka khlaw bad ka jingdum jong ka miet.
Ha ka jingkhynra, haduh 15 song ki jaiñ Saree ba la thmu ban shalan tuh sha Bangladesh la kurup.
Ïa kine jaiñ la aiti noh sha ka ophis Custom kaba don ha Dangar.
