Thnem ka jingpynrung kyrteng ‘We Card’ ki kynthei ha West Khasi Hills ban ïoh pisa

0

Nongstoiñ Nohprah 28: Ka All India Trinamool Congress (AITC) ka seng saiñpyrthei kaba dang thymmai ha ka jylla ka la sdang ïa kawei na ki projek ba thymmai ka bym pat ju lap mynno mynno ruh ha ka jylla bad kata ka projek ka dei da kaba pynrung kyrteng ïa baroh ki longkmie kiba duk da kaba ai shihajar tyngka shi bnai kawei ka longkmie.
Ha West Khasi Hills ka la sdang ïa kane ka projek ha sor Nongstoiñ da buh ïa ki artylli ki registration point ha ruh surok ha kaba ki longkmie kiba la ïoh jingtip ïa katei ka jingpynrung kyrteng ki la ïatur lymmuh lymmaiñ ha kitei ki registration point kiba la pynïaid da ki samla shyn-rang bad kynthei.
Haba la lap ïa kitei ki registration point la pyrshang ban kylli jingtip na kitei ki nongpynïaid ha kaba ki la ïathuh ba katei ka skhim ka dei kaba la mang kyrpang da ka party TMC na ka bynta ki longkmie kiba duk da kaba pynrung kyrteng bad pynshisha lyngba ki Election Photo Identity Card, Adhaar card, mobile number, Account Number bad kiwei kiwei bad lada jia ba kim don Adhaar Card ruh lada ki don tang ki EPIC ne ration card ruh ka la biang.
Haba pynshong nong-rim bad pyrkhat bniah ha kaba ïadei bad katei ka jingpynrung kyrteng ym lah ban len ba kan long ka jingkyrkhu kaba khraw ïabaroh ki longkmie kiba duk tasam kat kiba la pynrung ïa ki kyrteng jong ki namar lada ka jingïathuh jong kitei ki nongpynïaid ba kan ai ïa katei ka skhim kaba shihajar manla u bnai ka long thik kumba ki la ïoh pdiang ïa ka jingkyrkhu kaba kim shym la phohsniew mynno mynno ruh.
Nalor kata haba phai sha ka jinglong jingman jong ka ïoh ka kot, ka kamai kajih, ka bylla ka sngi ha kine ki snem ka long ba wat ki longkpa kiba im da kaba bylla sngi ruh ki hap ban shu shong ïng namar ym don bylla ei ei . La lap ruh ba bun ki long kpa kiba ju trei bylla ha ka dor laispah haduh sawspah tyngka ka shi sngi na ka 30 sngi lane shibnai don kiba ïoh bylla tang san sngi ne hynriew sngi bad lada ka menkmie kaba shu shong ïng kan ïohei shi hajar tyngka manla u bnai ym lah ban len ba ka ïng ka sem ka pahuh kan pahai.
Haba phai sha ka jingdon jong ki longïng kiba duk hapoh West Khasi Hills haduh mynta ki don da ki phew hajar ki longïng bad napdeng jong kitei ki phew hajar ki don ruh ki longïng kiba dei ki riewkynthei kiba u kpa ki khun u la iehnoh namar u la leit da kawei pat ka briew, ki don ruh ki long ïng kiba u kpa u la khlad noh, ki don ruh ki long ïng jong ki riewkynthei kiba shu khakhun rei arngut haduh laingut bad kiba kum kitei ki long ïng ki dei shisha kiba kyrduh bad kiba jynjar bha.
Dang ha kine ki khyndiat sngi uwei na ki rangbah u la ong ba ka don kawei ka longkmie kaba la don la ka ing ka sem bad u kpa ruh u don bad manla ka sngi u ju leit bylla ha ka dor sawspah tyngka hynrei um ju ai pisa ha ïng namarba baroh ka bai bylla ba u ïoh u pynlut tang ha kaba leit khwai ïathong kumta hadien ba ka menkmie kam lah shah shuh ka la beh noh syndon ïa u bad mynta ka hap ban sumar bad peit hi ïa ki khun jong ka.

Leave A Reply

Your email address will not be published.