Pynshna ïing ka Pyndengrei S&CC ïa ka riewkynthei ha ka dong Mawkhmahwir

0

Nongstoiñ, Nohprah 28: Ka Pyndengrei Social and Cultural Sports Club ha ka sngi nyngkong jong ka taiew ka 26 tarik u Nohprah kala aiti noh ia ka ïing sha ka kong Lucy Sohshang na ka dong Mawkhmahwir jong ka shnong Pyndengrei hadien ba ka Sport Club kala dep ban pynshna ia ka.
Kane ka long ïing kadei ruh kaba shem jynjar namar kadei ka long ïing jong ka riew kynthei kaba peit hi ia baroh ki jingdonkam ha ïing bad ia ki 5 ngut ki khun ba kynthup ia 3 ngut ki kynthei bad ar ngut ki shynrang hadien ba u kpa jong ka ïing um don shuh.
Na ka liang jong ka Sport Club kala shim ia kane ka sienjam ban leh isynei ia katei ka long ïing kum shi bynta jong ka jingrakhe ia ka jingdap 50 snem jong ka Pyndengrei Social and Cultural Sports Club.
Na ka liang jong u Sordar ka shnong Pyndengrei u bah M. Marwein u la khap ia u ribon kum ka dak ban aiti noh ia katei ka ïing sha ka kong Lucy Sohshang, ha ryngkat ka jingiadonlang ruh u Rangbah Dong Mawkhmahwir, u President bad Secretary ka Sport Club bad kiwei kiwei.

Leave A Reply

Your email address will not be published.