Seisoh ka jingïakynduh u Bah K.P Pangñiang ïa u SE Western Circle halor ka surok Tynghor-Athiabari

Nongstoiñ, Nohprah, 28: Ka jingpynbha bad siang rong ïa ka surok Tynghor–Athiabari kaba jngai kumba 16 kilomitar lyngba ka Pradhan Mantri Gramsadak Yojana (PMGSY) kaba ladep sdang naduh u snem ba ladep da kaba siang tang da ka khyndew kaba la khleh lang bad kawei ka jait dawai kaba la shna ha Russia kaba la tip kum ka ANT kam shym la larkam satia namar ka jingbym ïahap jong ka jaka bad ka jinglong jong ka suiñ bneng.
Kumta hadien ba ladep siang, namar ka jingjur jong u slap ha ka por lyiur katei ka surok kam neh satia bad ka la nang pynjynjar shuh shuh ïa ki paitbah namar ka la sniew arshah.
Kumta ka Synjuk ki Nongsynshar Shnong katei ka thaiñ ryngkat u MLA barim jong ka Rambrai-Jyrngam Constituency u Bah K.P.Pangñiang ki la pynlong da ka jingïalang ha kaba da kawei ka sur ki la ïamynjur lang ban phah da ka jingthoh sha u Supritendent Engineer ka PMGSY Western Circle, Nongstoiñ ha kaba baroh ki rangbah shnong ki la ïasoi ha ka jingthoh. Dei ha ka 21 tarik, Nailur mynta u snem u Bah Pangñiang ryngkat ki nongïalam ka Synjuk ki Rangbah Shnong ki la leit ban ïakynduh ïa u Supritendent Engineer bad ki la aiti ruh ïa katei ka jingthoh.
Ha kaba ïadei bad ka jingpynkylla ban siang ïa katei ka surok da ka rong kumba leh ïa baroh ki surok na ka liang ki paitbah katei ka thaiñ bad ka Ri Muliang ka la ai khublei ïa ka Sorkar ba ka la sngap ïa ka jingud jingnam jong ki paitbah.
Ha ka sngi hatmajai ha ka jingleit jurrip ïa katei ka surok la lap ba ka jing pyntrei ban siang rong ka la ïaid shait shait naduh lad Nongma haduh Tynghor.
U Bah S.Shylla uwei na ki Nongsynshar shnong ka thaiñ u la ong ba ki paitbah ki la ap kmihlynti ba u MLA ba mynta jong ka Rambrai Jyrngam u Bah Kimfa S. Marbaniang un leh ei ei na ka bynta katei ka surok hynrei ki san snem ki la jan kut wat tang ïa ka pisa kaba dei na ka MLA skhim kaba dei hok ban ai sha ki paitbah ruh kim ju ïoh satia lane u ai lut tang ha ki Party Leader ruh ïa kata ym lah ban tip.
U la ong ruh ba ha kaba ïadei bad kiwei kiwei ki lad jingïarap ba ka Sorkar ka la mang kyrpang na ka bynta ki paitbah ym ju tip ym ju bna shaei ki don lei lei sa kat ïa ka surok PMGSY kaba dei ka skhim jong ka Sorkar Pdeng tharai wat tang ïa ka ophis jong u Chief Engineer jong ka PMGSY ha Shillong ruh um tip ka don haei.
Haba kylli pat na ki paitbah nong shnong shnong pat naduh Domjaraiñ, Upper Langsah, Megadop haduh lad Nongma ba ki sngew kumno ha kaba ïadei bad ka jingshah jong ka Sorkar ban siang noh da ka rong ïa katei ka surok ki la ong ba ki sngewtynnad bad ki kmen haduh katta katta namarba lada la dep ban pyntrei ïa katei ka surok kan pynsuk shibun ha ka leit ka wan khamtam haba ki leit don kam sha Nongstoiñ kim donkam shuh ban leit na Riangdo namarba tang na Athiabari haduh Ringdo ka jingjngai ka long 37 kilomitar bad haduh Nongstoiñ ka don 81 kilomitar katba na Athiabari shaduh Nongstoiñ lyngba ka shnong Tynghor ka jingjngai ka don tang 68 kilomitar bad ka jingïapher ka long haduh 20 kilomitar tam.
Nalorkata, ki la ong ruh ba watla ki don shibun kiba kren beiñ ïa u Bah K.P.Pangñiang hynrei dei ha ka por ba u long kum u MDC san snem shiteng bad MLA shisien ba ka Rambrai Jyrngam Constituency ka la ïoh shibun ki jingmyntoi naduh ki surok, ki skul, ki jingkieng bad lymda dei ma u haduh mynta ka surok na Langja shaduh Tynghor wat ki trok ruh kim pat nud ban ïaid bad ka surok na Ktiehthawiar sha Langpih lei lei yn nai ïakren wat tang ban sorbe ruh ym pat thikna hynrei kitei baroh ki dei ki matti jong u Bah Pangñiang.
Uwei na ki rangbah na lad Nongma, ka shnong kaba don tang kumba ar kilomitar na ka Aradongga Higher Secondary School u la ong ba lada ym dei da ka jingtrei shitom jong u Bah Pangñiang ban pynïoh ïa ka skhim kaba T. 1.30 klur ban pynbha ïa katei ka skul haduh kine ki sngi ki la kyllon tharai namar ki rijied ki la bam kruiñ lut baroh sawdong.
U la ong ruh ba ki ar tylli ki jingkieng ha ka wah Tyrsung kawei na Aradonga sha Rangsahpara kawei pat na Mawkhrang sha Nongshyiap ki dei ki matti jong u Bah Pangñiang bad lada pynshisha ruh u mawkyrteng uba la thoh u sakhi shai ïa kata.