Da ki lak ngut ka ri India bad da ki hajar ngut tam tang nabar ri ki nongshang suwari pyrthei ki wan iuhkjat ha Meghalaya manla u snem. Kane ka pyni shisha ba ka kam jngohkai pyrthei ha ka jylla ka la nang kiew artet ha baroh ki liang. Katkum ka jingpyni jingkheiñ jong ka Sorkar Jylla hapoh ka Dorbar Synrai jong ka Ingdorbar Thawaiñ ka Jylla, tang haduh u snem 2017 ka jingwankai jong ki briew na bar ka jylla ka long 9 lak bad 12 hajar kiba nabar ka ri India.
Haba bishar ïa ka jingkiew ki kam jngohkai pyrthei ha ka Jylla ka dei ka jingtrei ratbah jong ka Sorkar Jylla lyngba ka tnat Jngohkai Pyrthei ka Sorkar Jylla kaba la theh ïa ki song pynroi ban kyntiew ïa ki jaka jngohkai. Ym lah pat ban len, ba ki riewshimet bad ki kynhun bapher bapher kiba la mih shakhmat ban phaikhmat sha ka kam jngohkai pyrthei kum kawei na ki lad kamai jakpoh.
Lyngba ka Meghalaya Tourism Development bad ka Investment Promotion Scheme, ka Sorkar ka la ai jingïarap ïa ki samla bad ki kynhun kiba plie ïa ki Resorts bad ki Home Stay. Hynrei watla katta ki don pat ki jingduna hangne hangtai kiba ka sorkar kan hap ban pynjanai ïa ka rukom treikam namar kumba ka long mynta ki don ki jaka jngohkai pyrthei kiba ka tnat Tourism ka dei ban shimkhia ban pynbha bad pynitynnat na ka bynta ban khring ïa ki paidbah nongjngohkai pyrthei hynrei ka don pat ka jingsuki kum ka mattah ban pyntyllun ïa ka kam.
Ha ka 27 tarik, u bnai Nailur, ka pyrthei baroh kawei ka ju rakhe ïa ka World Tourism Day ne ka Sngi Jngohkai pyrthei. Hynrei sngewsih pat ba kum ïa kane ka sngi ha ka jaka ban pynlong ïa ki jingrakhe ha ki jaka jngohkai pyrthei bapawnam jong ka Jylla hynrei la shu pynlong ïa ka jingrakhe tang ha ki saw kynroh jong ka State Convention Center. Lada bishar na ka jingïoh kamai jakpoh jong ki paidbah na ki kam jngohkai pyrthei, kam pat da long eh haduh katta katta, namar lada ïanujor tang bad ka jylla Sikkim, ka Meghalaya kam pat lah ban ïa kot rynieng ban da ïa thew ïa u diengkot khlem da ïa nujor bad kiwei kiwei ki ri jong ka Pyrthei.
Ha ka jingshisha, ka Meghalaya kum kawei ka jylla kaba don ha ka thaiñ Shatei Lammihngi ka dei ka jylla kaba riewspah bha ha ka jingdon ki um ki wah, ki ksaid, bad ki krem ki kroh kiba lah shisha haduh katta katta ban khring ïa ki nongshang suwari. Hynrei kine baroh ki shu sahkut tang ha jingshimkhia hi jong ki paidbah nongshong shnong kiba phaikhmat sha kane ka kam bad kiba angnud ban ïoh kamai jakpoh na kane ka kam.
Kane ka Jylla ka don da ki jaka jngohkai pyrthei kiba la ai kyrpang da ka mariang bad ka jingwan tuid ki briew nabar jylla ka long ban ïoh dih ïa ki umpohliew kiba shngiam bad ban mad ïa ka ‘er iwbih ki erbatemon ‘erbatesi namar sha ki jaka jngohkai pyrthei shabar ka jylla ki dei kiba shu shna hi da u briew ki bym lah ban da pynhun haduh katta katta ka mynsiem bad pynkhuid ïa ka jingmut jingpyrkhat bad pynjahthait ïa ka bormet bor phad.
Ka jingbym don ïa ka polisi treikam ka buh diengpynkiang ïa ka Sorkar Jylla ban pyntyllun ïa ka kam namar lada ïakren ïa ka jingkyntiew ïa ki kam jngohkai pyrthei kan shu kut beit tang ha ki jingpynlong ïa ki iew tamasa ba shi sngi bad ar sngi ki bym don jingmut eiei hynrei ki long tang ki lad kamai pisa jongno re jongno.
Kine ki jingkiew ki kam shang suwari ha kane ka Jylla ka pyni shai ba ki briew kiba nabar ka jylla ki da pynlut ïa ka spah ka phew bad ki la theh da ki klur tyngka. Kane ka phew klur ka la pynïoh kamai ïa ki trai kali, ïa ki Hotel, ïa ki dukan die jingbam, ïa ki nongshna tiar shna tar bad kiwei kiwei. Ki dang bun byllai ki jaka jngohkai pyrthei kiba ka Sorkar kam pat lah satia ban phaikhmat kumba la angnud da ki paidbah ka jylla ban kyntiew ïa ki kam jngohkai pyrthei namar ka jingtreikam ka Sorkar ka suki shaba palat ban pyntyllun ïa kawei ka File na kawei ka miej sha kawei pat.
Ka jingshna pynbha jong ka Airport Authority of India (AAI) ïa ka kad liengsuin ha Umroi ka la nang pynsuk shuh shuh ïa ki nongwan jngohkai pyrthei nabar jylla bad nabar ri watla kane ka jylla kam don satia ïa ka surok Rel. Kum kine ki rukom pyrkhat ka Sorkar ka ladei ban kyndit thiah bad ban pyrkhat bha ïa ka lawei jong ki samla kiba la nang la stad kiba shu shong khlem kam khlem jam. Ka shong eh ha ka mon u paidbah nongshong shnong ka Jylla, la ki mon neem ban pdiang ïa ka surok Rel ban kyntiew ïa ka kam jngohkai Pyrthei ha ka jylla bad kumjuh ruh ban plie ïa ki khyrdop jong ka Jylla ban pynsuk ïa ka rung ka mih ïa ki briew kiba nabar ban wan rung sha ka jylla, tangba ryngkat bad ki kyndon aiñ kiba da teh pyrkhing.
Ka Sorkar ka ladei ban wad ïa ki lad ki lynti kumno ban ïarap ïa ki kynhun bad ïa ki riewshimet kiba don ïa ki jaka kiba lah ban pynkylla kum ki jaka jngohkai pyrthei.
