Pynliem ka Golflink XI Stars ïa ka Turshaphrang ka Sportive Juniors ïa ka Municipal

Shillong, Nohprah 28 : Ka kynhun ïalehkai kriket jong ka Golflink XI Stars bad ka Sportive Juniors ki la khur nam jop ha ka lympung ïalehkai kriket jong ka kyrdan 3rd Division ba pynïaid da ka Shillong Cricket Association (SCA) ha ka jingïalehkai hynne ka sngi Balang.
Ka Golflink XI Stars ka la khur ïa ka nam jop da kaba pynliem da 6 wicket pyrshah ïa ka Turshaphrang katba ka Sportive Juniors ka la pynliem da 56 ron pyrshah ïa ka Municipal CC.
Haba phai sha ka jingïalehkai kaba nyngkong, ka Turshaphrang kaba la jop ïa ka jing-kynting pisa ka la kam trai ban tied nyngkong bad ka kamai 93 duh noh 10 wicket ha ki 16.3 over. Kiba la kamai ron bun na bynta ka kynhun ki kynthup u Banpynshngaiñ Dolloi u kamai 29 ron ha ki 29 bol bad u Leobert Khonerymmai u kamai 10 ron ha ki 21 bol, kiba la khur wicket na bynta ka Golflink XI Stars ki kynthup u Ankit Kumar Ojha ha ki 4 over u khur 4 wicket ai kamai 24 ron bad u Pritam Singh na ki 3 over u khur 2 wicket ai kamai 12 ron.
Ka Golflink XI Stars haba beh ïa katei ka ron ka la lah ban pyndep tang ha ka 11 over bad duh noh tang 4 wicket bad dei u Rahul Singh uba la kamai bun ron da 33 ron na ki 19 bol bud pat sa u Pritam Singh u kamai 30 ron na ki 25 bol. Kiba la ïoh khur wicket na bynta ka Turshaphrang ki kynthup u Shatphyrnai Bakai bad u Bashanbor Shangpliang ki ïoh khur mar shi wicket. Ha kaba kut la sam ruh ka khusnam Man of the Match ba la ïoh rah da u Ankit Kumar Ojha jong ka Golflink XI Stars uba ïoh khur 4 wicket.
Ha ka jingïalehkai kaba ar, ka Sportive Juniors kaba la kam ban tied nyngkong ka kamai 183 duh noh 2 wicket ha baroh ki 20 over, u Rishi Choudhury marwei u kamai 65 ron na ki 57 bol bad u Digvijay Roy u kamai 59 ron na ki 36 bol. U Rohit Ray u ïoh 2 wicket ai kamai 23 ron ha ki 4 over.
Ka Municipal CC haba beh ïa katei ka ron watla ka la ïalehkai bha ban pyndep ïa baroh ki 20 over hynrei kam shym la kynjoh sha katei ka thong ba la buh da ka Sportive Juniors bad kamai tang 127 ron. U Rohit Ray u kamai 40 ron na ki 32 bol bad u Chotelal Gupta u kamai 25 ron na ki 32 bol.
Kiba la khur wicket ïa ka Sportive Juniors ki kynthup u Suresh Balmiki u khur 3 wicket ai kamai 17 ron ha ki 4 over bad u Suraj Sharma ha ki 3 over u ai kamai 24 ron khur 3 wicket. Ïa ka nam Man of the Match la ïoh da u Digvijay Roy uba kamai 59 ron.