Shillong, Nohprah 28 : Ka Nongmadan ka la ïohrah ïa ka trophy kum ka lahduh hadien ba ka la pynliem ïa ka Madanheh East A da 1-0 ha ka final jong ka Phudmuri Inter Dong Under 12 Football Memorial Cup 2022, ka phutbol sahkynmaw na ka bynta ka I Kong (L) Veliancy Warlarpih ba la pynïaid da ka Seng Samla Mawlai Phudmuri ha madan heh mini stadium, Phudmuri hynne ka sngi Balang.
Ka namtam na ka bynta ka Nongmadan la thep da u Ïaisanlang Dohling, ha ka kyllastep bad kane ka la neh haduh bakut ka jingïakhun ba 30 minit.
Ki dong bapher bapher napoh shnong Phudmuri ki la shim bynta ha kane ka lympung ïakhun kaba shi sngi lynter.
Ïa kane ka lympung ïakhun la bei tyngka da u Albert Jao bad ka kurim ka kong Nerrisa Warlarpih, ka khun jong i kong (L) Veliancy Warlarpih.
Ha kane ka sngi la sam ruh ïa ki khusnam shimet, ka nam best player la ïoh da u Jason L. Nongpiur, best goalkeeper ka la leit sha u Denzil Kharrngi bad top scorer sha u Ïaisanlang Dohling, uba la thep 7 kol ha baroh ki jingïakhun.
Haba ai jingkren u kongsan u Bah Shngaiñ Slong u la pynpaw ïa ka jingkmen ban ïoh pynïalehkai ïa ka phutbol na ka bynta ki heprit.
U la pynpaw, watla ki la duh mynsiem haba sdang hynrei da ka jingïarap ka Seng Samla Mawlai Phudmuri la ïoh ban jam shakhmat.
U ïathuh ruh ba ka jingthmu haba pynlong ïa kane ka tournament ka long hadien ba ki la duh ïa I kmie, iba dei i kurim jong i, khamtam haba iwei I khun im shym la ïoh wan ha por ba ïap i kmie ba I don sha Canada, wat haba dap snem ruh i khlem ïoh wan na kadaw ka khlam Covid-19, i dang ïoh wan hadien 4 snem, bad mynta I don shane ban don lang haba pynlong ïa kane ka jingïalehkai sahkynmaw da ka phutbol.
Kiwei kiba la ai jingkren ki kynthup ïa u assistant rangbah shnong Bah Ulrich Warjri, na u samla Hambert Rani, president SSMP, S. Lyngkot, M. Lyngdoh, ha ka jingdon ryngkat ka seng longkmie Mawlai Phudmuri bad kiwei kiwei.
Na kane ka lympung ïakhun la ïoh ruh ban jied 30 ngut ki khynnah na ka bynta ban mihkhmat sha ka Under 12 kaban pynlong ha madan Polo, la shem snem.
