Thnam puk ka ishu jngohkai pyrthei ba shah bat ki kali tourist mar ïa poi ha Umtyngar, shah kem 10 ngut

Shillong, Naitung 26 : Kumba 10 ngut ei ei ki dkhot jong ka Hynniewtrep National Youth Front (HNYF) ha ka sngi Thohdieng ki la shah rah noh ha ki pulit hadien ba ki la pynsangeh ïa ki kali ba kit ïa ki nongjngohkai pyrthei ha Umtyngar kiba thmu ban leit kai sha ki thaiñ Sohra bad Dawki.
Katkum ka jingïathuh da u Superintendent of Police ka East Khasi Hills, Bah Sylvester Nongtnger la ong ba ïa kitei ki shiphew ngut la kem bad la rejistar mukotduma pyrshah ïa ki.
Halor kane, na ka liang u President ka HNYF Bah Sadon K Blah u la ong ba katei ka jingtalasi ka long ban phah da ka khubor kaba shai sha ka sorkar jylla ba kan buh ïa ki entry bad exit point kumba la kdew da ka Meghalaya Residents Safety and Security Act (MRSSA), 2016. U ong ruh ba kane ka kdew ba wat ki nongwan jngohkai pyrthei ki hap ban pyni ïa ka jingpynshisha haba ki wan sha kane ka jylla kum ki nongwan jngohkai.
U ong ruh ba dei namar ka jingbym lah jong ka sorkar ban buh ïa ki jaka rung bad jaka mih ka la pynlong ïa ki dkhot ka HNYF ban shim ïa kum kane ka sienjam.
“Hooid, ngi kubur ba ka ktah ïa ki nongwan jngohkai pyrthei hynrei kane kam mut pat ba ngi thmu tang ïa ki nongjngohkai pyrthei hynrei ngi kwah ba ka sorkar kan pyntreikam noh ïa ka MRSSA, kaba kdew shai ba ki nongjngohkai pyrthei ki hap ban pynshisha ha ka por ba ki rung shapoh ka jylla,” u la bynrap.
Na ka liang u Symbud Myntri Rangbah ka Jylla, Bah Prestone Tynsong haba kynthoh ba katei katei ka jingleh jong ki kadei kaei kaei ka bym itynnad u la ong, “Kane ka jingjïa mynta ka sngi kadei ka bym sngewtynnad bad ngim poi pyrkhat hi ruh ba ki katto katne ngut kin leh kumne (ban talasi ïa ki nongjngohkai pyrthei kiba thmu ban leit sha Sohra bad Dawki).”
Shuh shuh u ong ruh ba u kwah ban kren shai ba ka aiñ kan sa leh la ka jong ka kamram bad ba kin ym ailad da lei lei ruh ba kum kine ki jingjïa kin jia biang. Haba jubab halor ka jingkkylli, u Bah Prestone u la ong, “Nga kwah ban kren da kaba shai ba ym don mano mano ba lah ban palat ïa u pud, ai ba ka ain kan shim ïa la ka jong ka lynti bad to ai ba ngan ong ïa phi bunsien sngewbha uno uno wat shim ïa ka ain ha la ki jong ki kti. Lada phi don ki jingeh, ka Secretariat ka plie, ngi lah ban shong sha shiliang ka miej bad ïa kren.”
Halor ka jingshah pynbthei petrol bom ha kawei ka iing ha Jhalupara, u Symbud Myntri Rangbah u la ong ba haduh mynta ym pat don kano kano ka jingkem hynrei ki pulit ki dang don ha ka kam ban wad bad wad bad kem ïa ki riew donkti ha lyndet jong katei ka jingjia.