Ther kylla ki paidbah halor ïa kiba kynnoh ïa u rangbah Shnong ba thmu die ïa ka pung shnong ha Umroi Nongrah

Nongpoh, Jymmang 01: Ki paidbah bad ki nongïalam Shnong ka Shnong Umroi Nongrah mynta ka sngi ki la ther kylla ïa ki riew rangbah ka shnong Umroi Nongrah halor ka jingkynnoh pyrshah ïa u Rangbah Shnong ba u thmu ban die ïa ka Pung Shnong ba la kynnoh khlem ka jingtip ki paidbah bad ka Dorbar Shnong.
Ki padbah ki la mih ruh mynta ka sngi ban ther kylla ïa ki riew rangbah ba la ïalam da u Rangbah Shnong barim, u Bah P. Dkhar bad u Bah Jewel Lyngdoh, ka dei hadien ba ha kine ki khyndiat sngi ki la kynnoh ba u Rangbah Shnong, u Bah Baïateilang Lapang u la thmu ban die ïa katei ka pung shnong khlem ka jingtip ki paidbah bad ka Dorbar Shnong.
Ki paidbah naduh ki riew rangbah, ki Longkmie bad ki nongïalam Shnong mynta ka sngi ki la leit ban jurip lang ïa katei ka Pung Shnong ban pynshai halor ka jongshah kynnoh kumba la mih ha ki lad pathai khubor.
La pynshai paidbah ruh ba kane ka Pung kam dei satia ka pung shnong bad ka dei ka pung jong ka VEC ka Shnong ha kaba ïa ka dulir la thoh ha ka kyrteng ka VEC bad ym kumba la kynnoh ba ka dei ka pung shnong da ki riew rangbah kiba la pynpaw ha ki lad pathai khubor.
Kumba la pynpaw da ka Kong T. Makhroh, kaba dei ka Secretary ka VEC, u Bah J. Nongkseh, Dkhot ka EC bad u Bah A.S Roy Malai kum u Adviser ki la ther tyngeh ba ka jingkynnoh ba u rangbah Shnong u thmu ban die ïa ka Pung Shnong ka long kaba ym don nongrim bad la shu kynnoh tang ban pynjah burom ïa ka shnong bad ïa u Rangbah Shnong uba khlem da leh satia marwei ïa katei ka kam bad la rai da ka dorbar ka Job Card Holder ba katei ka pung ka dei ka nongkynti jong ka VEC.
Ki la pynshai ruh ba ïa ka rai ban die ïa ka pung shnong kaba long trai da ka VEC kam dei ka rai ba shim marwei tang u Rangbah Shnong, hynrei la rai da ka dorbar shnong bad ka executive committee kiba dang shu thmu ban die ïa ka pung ban thied bujli ïa ka jaka shnong bad wat la katta ruh kim pat shim ïa ka rai ban die ha kaba la shu tyrwa sha ki paidbah la ki sngew ïahap ne em ïa kata ka rai bad ka jingkynnoh pat ka long sha ba palat kaba la ktah ïa ka burom ka shnong bad khamtam ïa u Rangbah Shnong.
Na ka liang u Rangbah Shnong, u Bah Baïateilang Lapang ruh u la pynshai ba kam don kano kano ka jingleh marwei ban die ïa katei ka pung bad dei ka jingrai ki paidbah hi da ka Dorbar jong ka Job Card Holder namar katei ka pung ka dei kaba long trai da ka VEC ym kata ka pung shnong.
Halor katei ka kam pynjah burom, na ka liang u Rangbah Shnong, u Bah Baïateilang Lapang u la dawa ruh ba kito kiba kynnoh ki dei ban pan map bad ban pynshai hapoh ka 48 kynta bad lada kim lah ban pynshai ka dorbar shnong bad ma u kum u rangbah shnong kim banse ban ïaid sha ki bor bahalor halor kane ka jingkynnoh ba khlem nongrim bad kaba khlem da wad ïa ka jingshisha na ki nongïalam Shnong.