Shillong, Naitung 18: Ka NPP ka la ther tyngeh ïa ka Naga Proples Front da kaba kynnoh ba ka khring tuh bad thied kulai ïa ki Nongmihkhmat jongka ha Nagaland .
Ha ka jingpyllait khubor na u National Working President u James K Sangma u la ong ba ka jingpynrung dkhot ïa ki arngut ki dkhot jongka Municipal jongka na Kohima sha NPF ka dei ka sien kaba ar ba ka la thied kulai ïa ki dkhot jongka tang hapoh ki khyndiat por.
Kham mynshwa arngut ki dkhot jongka na Dimapur ki la shah khring tuh sha ka NPF.
La kynnoh ba kane ka jingïai leh jong kane ka party ka kdew ba ka shu lap miet ban tuh ïa ki dkhot jong kiwei ki party ban ïa kaba ka shakri ïa ki paidbah.
La ong ba ka election bad ka jingsynshar ki dei ban long halor ka nongrim jongka party ym ban leh da ki kam ban pyntlot bor para party. Nalor kane ka NPP ka pynpaw ruh ka jingpyrshah jur halor ka rukom pynrung dkhot ïa ki briew jongka.
Ka NPP ka pynpaw ba ka la ïoh jingtip ba ki dkhot jongka ki la shah byrngem byrsit bad lada kim pynïasoh sha ka NPF kin duh lut ïa ki skhim pynroi pynpar ha ki constituency jongki.
“ Lada kane ka long kumta ka mut ba la pyndonkam bakla ïa ka bor. Namar ka roi ka par ka dei jong ki paidbah bad kam dei ban long kum ka atiar ban pyntieng pynsmiej ban ïoh jingmyntoi ha ka saiñ pyrthei. Lada ïa ka bynta jong ki paidbah la pyndonkam na ka bynta ka jingmyntoi jongka party kata ka mut ba la ïuhroit syndon ïa ka jingsynshar paidbah” ong ka kyrwoh.
Wat hapdeng kine kiei kiei ki jingjia ka NPP ka pynpaw ba ka jingïadei bad ka NPF kam ïajgnai satia ka ïai bteng kumjuh wat bad kiwei kiwei ki party ruh.
Sniewbok tang kawei ba ka paralok kaba ïajan ka shet ïa kawei pat ka paralok ha ka jaka ban ailad ban ïakiew shaprang.
“ Ngi kular ïa ki para dkhot jongngi bad ïa ki nongkyrshan ba ieit ka NPP ba ngin dang ïai trei shitom ba ngin dang kiew bad khlaiñ bad ngin ïai bteng ban shakri hok ïa ki paidbah ka Nagaland kum ka party kaba ïeng ha ka hok bad jingshisha” pynkut ka kyrwoh.
