Shillong, Lber, 05: U nongïalam jong ka NPP u Thomas A. Sangma uba long u MLA jong ka North Tura ha ka sngi Baar u la shah jied kum u kyrtong jong ka Meghalaya Democratic Alliance (MDA-II) na ka bynta ban ïakhun ïa ka shuki Lamphang jong ka ïingdorbar Thawaiñ ka Jylla.
U Thomas Sangma u la thep kyrteng hakhmat u Commissioner & Secretary jong ka Assembly u Dr. Andrew Simons ha Assembly Secretariat na ka elekshon ban jied ïa u Lamphang ka ban sa long ha ka 9 tarik mynta u bnai.
“Nga ai khublei ïa u Thomas A Sangma, kum u nongshah jied ban shimti ïa ka shuki Lamphang jong ka Iingdorbar Thawaiñ,” ong u Myntri Rangbah ka Jylla u Conrad K.Sangma ha ka rynsan Tweeter.
Ha ka jingïakren bad ki lad pathai khubor, u Thomas u la ïaroh ïa ka rai jong ka Sorkar MDA-II ba la ïalam da u Conrad Sangma ban jied ïa u na ka bynta kane ka shuki. U la ai khulei ruh ïa ka Sorkar ba la leit noh kaba la ailad ïa u ban shakri ïa ki paidbah.
Ka Sorkar MDA-II ka la ïoh ïa ka jingkyrshan na ki 45 ngut ki ML ha kaba 26 ngut ki dei na ka NPP, 11 na ka UDP, 2 na ka BJP, 2 na ka HSPDP, 2 na ka PDF bad 2 ngut ki MLA Independent.
Ka Liang Pyrshah ha kawei pat ka liang, ka don ïa ka bun paidbah kaba 14 ngut ki dkhot kaba kynthup ïa ki 5 ngut ki MLA jong ka seng Congress, 5 ngut na ka All India Trinamool Congress bad 4 ngut na ka Voice of the People Party.
