Mar ar snem shiteng rai ka BJP ban bujli shuki Myntri ïa u Bah Hek bad Bah Sanbor Shillong, Lber, 05: Ka Bharatiya Janata Party (BJP) ka la phah da ka jingthoh sha u National President jong ka National People’s Party (NPP) u Conrad K. Sangma ban bujli ïa ka shuki Myntri hapdeng u Bah Alexander L. Hek bad u Bah Sanbor Shullai kiba long ki arngut ki MLA jong ka BJP. Ka BJP ka dei ka seng saiñpyrthei kaba la ïatreilang bad ka NPP ha Delhi bad ha kane ka jylla naduh u snem 2018 bda mynta ka myntu ruh ka la ai jingkyrshan ïa ka NPP kaba la ïalam ïa ka Sorkar Meghalaya Democratic Alliance (MDA-II). “Da ka jingmynjur ïa ka rai jong ki nongïalam bahalor ban ailad mar katjuh ka jingïoh bat ïa ka shuki Myntri jong ki arngut ki MLA ka BJP la kyrpad ban bate mar ar snem shiteng,” ong u State President ka BJP u Bah Ernest Mawrie ha ka shithi ba la phah sha u Conrad Sangma ba la soi lang da u National Vice President u Dr. M. Chuba Ao. “Ka Party bad ki MLA ki la mynjur ban ailad shwa ïa u Bah AL Hek ban long u Myntri hapoh ka Sorkar na ka bynta ar snem shiteng ka ban kut ha ka 7 tarik, Nailar, 2025 bad hadien kata kan dei pat sa ka pali jong u Bah Sanbor ban don hapoh ka kynhun Myntri na ka bynta ki snem kiba dang sah,” la ong ka Party. “Ïa ki arngut ki MLA la bthah ba kin burom ïa ka rai jong ka party bad ban ïatreilang na ka bynta ka jingmyntoi bad ka jingïabiang lang. Ka jingdon jong ngi hapoh ka sorkar kan pynmyntoi ïa ki paidbah bad ïa ka jingkhuid jingsuba. Namarkata nga kyrpad ïa ka ophis jong phi ban burom ïa ka rai jong ka party bad ban pynthikna ba kine ki arngut ki MLA kin ïoh ïa kajuh ka lad ka kabu ha kaba ai jingkyrshan ïa ka sorkar jong phi,” la bynrap u State President ka BJP. Hadien ba la wai ka jingïalang pynbam smai ïa ka kynhun jong ki 12 ngut ki Myntri Sorkar, u Bah Sanbor Shullai ha ka jingïakren bad ki lad pathai khubor ula ong, ba kane ka kynti ka la don ka jingïamynjur ban bujli shuki Myntri hapdeng ki arngut ki MLA ïa kaba la mynjur ruh da ka jingsakhi lang jong ki nongïalam ym ha ka samoi kaba ladep ha kaba la shu ïa mynjur tang da ka ktien. “Nalor u Myntri Rangbah, ïa ka shithi la phah ruh sha u National President jong ka BJP u JP Nadda bad sha u General Secretary u Rituraj Sinha,” u la ong. Haba kylli, u Bah Shullai u la ong ba um don kano kano ka jingeh ban ap ïa la ka jong ka pali ban shimti ïa ka shuki myntri hadien ar snem shiteng. “Ka shong eh ha ka mon jong u Myntri Rangbah. Ngan pdiang beit ïa kano kano ruh tang na ka bynta ka jingmyntoi jong ki paidbah ka Constituency jong nga,” u la ong.