Shillong, Lber, 05: Kum shi bynta ka jingrakhe ïa u bnai ban ïakhun pyrshah ïa ka jingpang Tuberculosis ha ka pyrthei baroh kawei, ka State Tuberculosis Office, Meghalaya ha ka Lah Sngi U Blei ka la pynlong da ka drama surok bad ka jingïaid rally jong ki khynnah skul da ka jingïashim bynta jong ki khynnah pule ka Seng Khasi Secondary School, Smit.
Ka State Coordinator ka Kong Tracy Kharkamni ka la ai jingkren kaba bniah halor ka phang National Tuberculosis Elimination Program of eliminating TB ha u snem 2025. Namarkata ka long kaba donkam ban ïatreilang bad ban kyrshan ïa ki nongpang TB bad ban pynkut noh ïa ka jingkren beiñ bad ka jingibeiñ ïa ki briew kiba don ïa kane ka jingpang.
Ha kane ka sngi, ki khynnah skul ki la shim ruh ïa ka jingsmai ban pynlong ïa ka jylla Meghalaya kaba lait na ka jingpang TB.
U Bah Andrew Marbaniang uba long uwei na kiba la ïoh jingkoit na ka jingpang TB u la phla kumno u la ngat ha kane ka jingpang bad kumno u la shah sumar bad dih dawai tista haduh ba un da ïoh biang ïa ka jingkoit jingkhiah da kaba ai khublei kyrpang ïa ka tnat ka Koit ka Khiah jong ka Sorkar Jylla kaba la ai ïa ka jingsumar kaba paka ïa kaba khlem da donkam ban siew pisa eiei wat tang shi naïa ruh.
U Senior Treatment Supervisor u Bah Wanrap Kharumnuid u la kren bad pynsngewthuh sha ki khynnah skul kumno ban ïada bad ban sumar ïalade ban lait na kane ka jingpang. U la batai ruh ïa ki bynta jong ka jingpang TB kiba kynthup ïa ka Pulmonary bad ka Extra Pulmonary TB, ïa ki dak ki shin bad ki dak jingshitom, ki rukom ai jingsumar bad ki lad jingïada.
Shuh shuh u la pynshlur ïa ki khynnah ba kin sam ïa ki jingtip sha ki bahaiing hasem bad sha ki paramarjan khnang ba kin dup tip shaphang ka jingpang TB bad kum ki khynnah kin dup long ki nongrah ktien na ka bynta ban ai jingpynshai sha kiwei pat kumno ban ïada ïa lade na kane ka jingpang.
Hadien kane la pynlong pat sa ka jingïaid rally bad ka jingïalehkai drama da ki samla pule jong ka Bachelor of Social Work ka Women’s College halor ka phang “Awareness on Tuberculosis: Let’s support for a TB Free Meghalaya.”
