Shillong, Lber, 05: U Bah Aubrey Herbert Scott Lyngdoh uba long u riewsaiñ pyrthei ba la rim bha ha ka jylla u la khladnoh na kane ka sla pyrthei ha ka rta kaba la 93 snem ka rta ha ka janmiet sngi Baar ha ingsah jong u ha Pohkseh, Shillong.
U Bah Scott u la long u nongmihkhmat la ar samoi kynthih na Jaïaw Constituency hapdeng u snem 1993 haduh u snem 2003.
U la iehnoh shadien ïa ka kurim jong u bad saw ngut ki khun. Ïa ka met ba dang sah yn sa tep donburom ha ka 9 tarik mynta u bnai ha u lum jingtep ka Balang Presbyterian Jaïaw, Shillong. U Bah Scott u la shongthait na ka kam ha u snem 1987 kum u Chairman jong ka Delhi Agriculture Marketing Board.
U la long ruh u Chief Secretary jong ka Sorkar Mizoram bad kum u Myntri ka tnat Pla Tyngka bad u Myntri ka tnat Kam Pohïing jong ka Sorkar Jylla.
U la jop nyngkong eh ïa ka elekshon na ka tiket jong ka Hill People Union (HPU) ha u snem 1993 bad ha ka elekshon kaba la long ha u snem 2008 u la jop na ka tiket jong ka United Democratic Party. Ha u snem 2003 u la shah pynliem noh ha u Bah Paul Lyngdoh uba long mynta u MLA jong ka West Shillong Constituency.
U Bah Scott u la long ruh u dkhot ba shitrhem jong ka Indian National Trust for Art and Culture Heritage (INTACH) bad bat ruh ïa ka kyrdan kum u Convenor.
Na ka liang u MLA ba rim ka Mawlai bah P.T Sawkmie u la phah ïa ka khubor sngewlem sha ka ïing ka sem jong i bah A.H Scott Lyngdoh halor kane ka jingkhlad noh jong i na sla kane ka pyrthei. U bah Sawkmie ila pynpaw ba u la ïatrei lang bad I bah A.H Scott Lyngdoh ha ka sorkar kum ki nongmihkhmat paidbah khamtam ha u 1998 ba ki la ïathaw lang ïaka MDP. I la pynpaw ba u long uwei na ki nongïalam uba tbit bad proh jabieng bha haba ïatrei ha kino kino ki kam ban tei ïa ka jylla bad jaidbynriew. Kumta I duwai bad kyrmen ba ka Mynsiem jong i kan leit suk sha dwar U Blei bad shongsuk ha syndah jong u Trai Jisu.
