Shillong. Lber 07: U National Vice President ka BJP uba dei peit ïa ka Meghalaya u Dr M Chuba Ao ha ka sngi Ba-ar u la kbum ka shyntur khlem jubab haba la kylli da ki nongthoh khubor la ka BJP kan bteng ne em ban kren pyrshah ïa ki kam bamsap jong ka sorkar MDA II.
Haba la kylli la ka BJP kan ïaid sha khamt ne em ban thung jingtohkit halor ki jingkynnoh bsmap jong ka sorkar Meghalaya Democratic Alliance (MDA-I), u Dr Ao u la ong, “Mynta ngim kren eiei shuh shaphang ka bamsap. Ai ngin thaw ïa ka sorkar bad peit haduh katto ngin synshar beit ïa kane ka jingsynshar ka MDA II na bynta ka jingmyntoi u paidbah.”
Shuh shuh u la ong ba ka jingkynnoh bamsap ka BJP ïa ka sorkar MDA ka dei tang ka jingkynnoh khlem kino kino ki sakhi sabut bad ka dei ruh tang shuwa ka elekshon.
“Ka dei tang ka jingkynnoh khlem ka sakhi sabut bad ngi ruh ngin ïeng ha kane hi keiñ ka nongrim bad ngin ïai trei bad dei ynda ngi la trei ngin tip haei ka don ka bamsap,” u la ong.
Haba kylli la u mut ban ong ba kam don bamsap ha ka sorkar MDA-I, une u nongïalam ka BJP u la ong, “Kumba long hakato ka por ngim da ïajan than ha kato ka por la shu thaw sorkar tang ban pyndap ïa u nombor hynrei ha kane ka kynti kaba mynta ngi long tylli mlon kum ka kynhun synrop lang ha ka sorkar.”
Haba ïadei bad ka jingkynnoh bamsap u Ao u la ong ba ki dei tang ki nia kiba mih shuwa ka elekshon.
“Ki bun jingkynnoh ïa ngi ba ngi dei kata ka party Hindu ne Hindutva…” u la ong.
