Ka Liang Pyrshah kan bud dien ïa ka MDA 2 ban trei bha na ka bynta ki paidbah : Ronnie

Shillong, Lber 7 : U Nongïalam ka Congress Legislative Party (CLP) u bah Ronnie V Lyngdoh uba long u MLA ka Mylliem u la ong ba ka Liang Pyrshah kan pynthikna ba kan bud dien ïa ka sorkar MDA -2 khnang ba kan trei bha na ka bynta ka jingmyntoi ki paidbah.
ïa kane u la jubab halor ka jingkylli mano ban long u nongïalam ka Liang Pyrshah. U bah Ronnie u la ong ba ka jingkylli mano ban long nongïalam kam don jingmut namar kaba kongsan ka long ba ki seng saiñ pyrthei kiba don ha ka liang pyrshah kin ïatrei lang kum kawei ka kynhun ban peit ba kane ka sorkar ka dei ban ai ka jingshakri kaba paka ïa ki paidbah.
Kumba long mynta ka Liang Pyrshah ka don 14 ngut ki MLA, 5 na ka Congress, 5 na ka TMC bad 4 na ka VPP. Lada bud ïa ki rukom kiba rim la dei ban ïoh nongïalam Liang Pyrshah na ka Congress namar ka dei ka National Party hynrei “ Halor kane ngin sa ïa shong pyrkhat lang namar kaba kongsan ka long ba ngin shim ïa ka bynta ka ban wanrah ïa ka Liang Pyrshah kaba khlaiñ namar dei lyngba ki jingai jingmut na ka Liang Pyrshah ba ki paidbah kin ïoh shibun ki jingmyntoi” ong u bah Ronnie.
Kine ki Seng Saiñ Pyrthei ki la pyrshang ban thaw ïa kawei pat ka sorkar da ka jingïalang lang ka UDP, HSPDP hynrei ka la pulom noh namar ki arngut ki MLA ka HSPDP ki la leit kyrshan noh ïa ka NPP. Hadien kane ka UDP bad PDF ruh ki la leit kyrshan lang ïa ka sorkar u Conrad K Sangma.
Haba la kylli u bah Ronnie u la ong “ Nga ngeit skhem ba ka UDP, HSPDP bad PDF ki kwah ban ïoh ïa ka sorkar kaba skhem na kata ka daw ki sa leit ban ai ka jingkyrshan. Namar dei tang ka jingsynshar kaba skhem ka ban wanrah ïa ka roi ka par ha ka jylla bad kane ka dei kaba donkam tam” ong u bah Ronnie.
U kyntu ïa ka sorkar MDA 2 ba kan shim khia ban kyntiew ïa ka jingkoit jingkhiah, pule puthi, bad ban pynthikna ba ha kine ki san snem ka jylla kan kiew shaphrang ha baroh ki liang naduh ki surok ki lynti ki synkieng bad haduh ka umbam umdih bad kiwei kiwei ki bynta ruh.