Thep kyrteng u Conrad ha Tura kyrmen ban ïoh bat ka NPP ïa ka jingsynshar mynta ka kynti

Tura, Rymphang 04 : U Myntri Rangbah ka Jylla bad National President ka National People’s Party (NPP) Conrad K Sangma, mynta ka sngi saitjaiñ ula thep kyrteng kum u kyrtong sha ka elekshon MLA 2023 bad kyrmen ruh ba ka NPP ha kane ka kynti kan ïoh ïa ka jingjop ba palat ïa shiteng ka jingdon ki MLA ha Jylla.
U Conrad ula thep kyrteng hakhmat u Returning Officer ka 51-South Tura bad Addl Deputy Commissioner Saljong R Marak ha Tur,a bad la synran ïa u da ki bahaïing hasem, ki nongïalam bad ki nongkyrshan ka NPP.
Shuwa kane ka jingthep kyrteng, une u Khliehduh ka NPP bala synran da ka kurim, kila leit sha u Lum jingtep jong u kpa bala khlad noh bad Myntri Rangbah barim ka Jylla u PA Sangma ha Tura, ban pan ïa ka jingkyrkhu.
Haba kren sha ki nongthoh khubor hadien ba thep kyrteng, u Conrad ula ong ba ka lyer kala beh bha sha ka NPP bad ki Liang Pyrshah kila nang troiñ na ka sngi sha ka sngi.
“Namar kata, na kane ka jinglong jingman ha ka saiñ pyrthei, nga ïohi ba ka NPP kan kynjoh ban ïoh ïa ka jingjop ba mar shiteng na ka jingdon ki MLA ha Jylla bad ngi sngewskhem ba ngin kot ïa kane” ula ong.
Halor ki ishu kaba ka party kan ïeng ban ïakhun ia ka elekshon, ula jubab “Ngin nang pyntyllun shakhmat ïa ki kam pynroi ba ngi la leh ha kine ki san snem bad baroh ki kam kiba la leh ha ki tnad bapher bapher bad namar ngi la buh ïa ki mawnongrim, kala dep ka por ban pyntyllun shakhmat sha kawei pat ka kyrdan..bad ka jinghap bteng ka long kaba kongsan ban pynthikna ba ngin lah ban kynjoh ïa kine ki thong treikam”.
U Conrad ula ïakhun ban jop biang na South Tura, kaba ula jop hadien ka jingshah jied kum u Myntri Rangbah ka Jylla ha ka elekshon shiteng samoi kaba long ha u bnai Nailar 2018. Ula ïoh haduh 13,656 vote bad pynliem ïa u kyrtong ka Congress Charlottee M Momin uba wan ba-ar da 8400 vote.
Shuwa kane, ula long u Member of Parliament (MP) ka Tura (2016-2018). Hadien ka jingkhlad noh u Kpa (L) PA Sangma, ha ka 4 tarik Lber 2016, uba dei ruh u MP ka Tura ha katei ka por, u Conrad ula ïakhun ïa ka elekshon shiteng samoi na Tura sha ka ïingdorbar Lok Sabha ha u Jymmang 2016 bad ula jop kput da 1.92 lak vote.
U Conrad ula bam smai kum u Myntri Rangbah ka Jylla ha ka 6 tarik Lber, 2018.
Kum ban shu kdew, ka sngi khatduh ban thep kyrteng sha ka elekshon MLA 2023 kan long ha ka 7 tarik u Rymphang. Ka jingbishar kyrteng kan long ha ka 8 tarik Rymphang bad ka sngi ba khatduh ban weng kyrteng ka dei 10 tarik Rymphang 2023. Ka jingthep vote kan long la 27 tarik bad ka jingpynbna ïa ka result kan long ha ka 2 tarik Lber, 2023.