Ha lynti ka shuki CM sha u Khasi, ngi hap ïoh shwa ïa u magic number : Bah Prestone

Shillong, Rymphang 04 : U National Vice President ka NPP, Bah Prestone Tynsong ba dei ruh u Symbud Myntri Rangbah ka Jylla, ha ka sngi Saitjaiñ u la ong ba ka thong ong ka party mynta ka long shwa ban ïoh ïa u ‘magic number’ lane u number ba palat 30 ngut ha shwa ba kin ïa kren mano ban ïalam ïa ka jylla kum u Myntri Rangbah.
Ïa kane u Bah Prestone u lakren hadien ba u la dep ban thep kyrteng kum u kyrtong ka party na Pynursla constituency na bynta ka elekshon MLA kaban sa long shen ha ka 27tarik mynta u bnai.
Shwa kane, haba jubab halor ka jingkylli la ka don neem ka jingpynbeit ba kat ka thaiñ (kata na rilum Khasi bad na rilum Garo) kaba ïoh bun ki MLA kan ïoh ban jied ïa u Myntri Rangbah, u Bah Prestone u la ong, “Ngin ïakhun shwa da kawei ka bor ka buit bad hadien ba ngi la ïoh ïa u magic number ba 32, 33 seat, ki dkhot ba dang shah jied kin sa shong jied pat ïa u nongïalam ba thymmai. Ïa mynta hi, kumba nga ong, ngi dang don hapdeng ka jingkieng bad kumta kaba donkam ka long ban kam shwa ïa ka jingkieng.”
Nalorkata u la kam ruh ba ka lyer jong ka NPP ka beh bha kylleng kylleng bad kumta ki don ka jingsngewskhem ba kin ïoh beit ban tam ïa utei u magic number.
“Nga la leit kylleng ki jaka bad ki constituency bad kumta nga ïoh ba kane ka elekshon kaban long ha ka 27tarik, ka bor jong u paidbah kaba la paw ha kylleng jan man ki jingïalang kadei beit ha ka kyrteng jong ngi. Kumta nga sngew tikna ba ha ka 02tarik, ngin lah ban tam ïa utei u number ba ngi donkam bad haba ngi la dep ban kam ïa ka jingkieng, ngin sa ïoh ban thaw ïa ka sorkar la ka jong,” u la ong.
Da kaba kyntait pat ban kren ïa ka nongrim ba kiwei pat ki sengsaiñ pyrthei ki ieng halor ka ILP, u Bah Prestone u la ong ba ka NPP ka buh thong ban buddien ïa kane ka kam bad ka sorkar India ban pyntreikam ïa ka bad ruh na ka bynta ban kynthup noh ïa ka ktien Khasi bad Garo ha ka Khyrnit kaba Phra jong ka Riti Synshar jong ka Ri.
Haba pynshai pat halor ka jingkynnoh bamsap kiba bun ïa ka sorkar MDA, u Bah Prestone u la ong ba mano mano ruh ki lah ban pynmih kino kino ki jingartatien ïa ki paidbah hynrei lada ki don pat ka jingshisha ki lah ban leit sha ki bor ka aiñ.
“Nga ju ong ruh ïa ki ba lada phi don katne katne ki jingkynnoh pyrshah ïa ka sorkar ba ïalam da ka NPP, phi dei ban ïaid katkum ki lynti jong ka aiñ ha kaba ngin ym lah ban buhrieh ei ei ruh. Nga ïathuh ïaphi ïa, ba ka sorkar ba ïalam da ka NPP kan ïai bteng ban leh ïa kaba bha tam bad ban pyndep ïa ka jingangnud jong ki paidbah ka jylla,” u la ong.