Shillong, Rymphang 05 : Ka ‘Nongkhyriem Winter Games 2023’ ka la kut hapdeng ka jingiphuh iphieng bad i shongkun hadien ba la pynhap pyrda noh ha St Xavier School, Nongkhyriem ha ka 4 tarik u Rymphang, 2023. Ha kane ka Winter Games kaba la pynïaid da ka Seng Samla Bhalang Nongkhyriem ki don ki jingïakob ïalehkai bapher bapher kum ka Football, ka Basketball, ka Skoi, Kriket, Quiz, ïakob shad, rwai, ki jingïalehkai jong ki heprit bad kiwei kiwei.
Ha kine ki jingïakob bapher ba la shim bynta shit rhem da ki nongshong shnong ka Shnong Nongkhyriem, Nongthymmai. La pynkut ïa ka prokram da ka jingshad, rwai na ki nongjop ha ka jingïakob, la wan ban pynshongshit lang ha kane ka sngi da u Samla Danny Lyngdoh bad ka kynhun ‘BadBhoi, ka jingsam ïa ki khusnam sha ki nongjop ha ki jingïalehkai bapher bapher bad ka jingtem DJ.
Ha kane ka sngi kut la wan sakhi lang da u Bah Latiplang Kharkongor, MDC Nongthymmai Constituency kum u Kongsan, ka Seng Kynthei Nongkhyriem, ka VDP Nongkhyriem, Assistant Rangbah Shnong Bah O. S. Nongkhlaw, ki nongkitkam shnong, ki nongkitkam ka Seng Samla Bhalang Nongkhyriem, ki paidbah nongshong shnong bad kiwei kiwei.
Na ka liang u Secretary ka Seng Samla Bhalang Nongkhyriem u samla Synsharlang L.Rngaid u la ai khublei ïa baroh kiba shim bynta, ïa ki dkhot jong ka Winter Games Committee bad baroh kiba don bynta ha ka jingpynlong ïa ka Winter Games 2023 kaba jop, kaba ïaid beit ïaid ryntih bad ka jingkitbok sha baroh ki samla ban ïakhun ïa ki eksamin bapher bapher jong une u snem. Ha kane ka sngi la ïoh ruh ïa ka jingkren na u Bah Latiplang Kharkongor bad AssistantRangbah shnong.
