Shillong, Jylliew 28 : Ka KHADC ha ka sngi Balang ka la rai ban thaw thymmai biang ïa ka Select Committee na ka bynta ban bishar bad pynbeit ïa ka KHAD (Khasi Inheritance of Property) Bill, 2021.
Haba wanrah ïa katei ka mat ha ka sngi ba khatduh jong ka Dorbar Mangtyngka, u CEM ka Council, Bah Pynïaid Sing Syiem u la ong ba ïa katei ka Bill la phah sha ka Select Committee hynrei hadien bun ki jingïalang ym pat lah ban pyndep pura ïa ka kumta la donkam pan por biang ban pyndep ïa ka.
Shuh shuh u ong ruh ba da ka jingwan noh ka jingkylla ha ka bor synshar la donkam ban pynkylla thymmai ruh ïa ki dkhot ka Select Committee.
Katei ka Committee ba thymmai ban khlieh da u CEM ka kynthup ïa u Deputy CEM Bah PN Syiem, Nongïalam ka Liang Pyrshah Bah Titos W Chyne, Bah Martle Mukhim, Bah RV Lyngdoh bad ruh u Bah Charles Marngar.
