Thang ka NESO ïa ka Rule jong ka Citizenship Amendment Act, 2019 ka Sorkar India

Shillong, Lber, 12: Tang shi sngi hadien ba ka Sorkar India ka la pynmih paidbah ïa ka Rule jong ka Citizenship Amendment Act, 2019, ka North East Students Organisation (NESO) kaba long ka shatri jong ki sengbhalang bapher bapher ka thaiñ Shatei Lammihngi ha ka sngi Baar ka la thang ïa ka Rule jong kane ka aiñ hakhmat ka ophis treikam jong ka Meghalaya Board of School Education (MBoSE) ha Lower Lachaumiere, Shillong.
La lamkhmat ban thang ïa kane ka Rule da u Chairman jong ka NESO u Bah Samuel B Jyrwa ryngkat ka jingsynran lang jong ki nongïalam ka Khasi Students Union (KSU), ki dkhot jong ka Federation of Khasi Jaiñtia and Garo Peoples (FKJGP) bad kiwei kiwei.
“Lada ka Assam ka shah ktah suki suki kiwei ki bynta jong ka thaiñ Shatei Lammihngi baroh kawei kin shah ktah. Lada phi ong ba ngi don ïa ka Sixth Schedule ha kane ka jylla, kumno pat ka jingjyllei jong ki bar jylla ka jur haduh katne katne. Ka Sixth Schedule katkum ka jingïohi jong ngi ka khlem lah ban ïada ïa ka jingrung jong ki bar jylla bad kiba bun ki bynta jong ka Sor Shillong bad ki bynta jong ka khappud jong ka jylla la bun da kiwei pat ki jaidbynriew. Lada kata ka Sixth Schedule ka lah ban ïada, balei pat kam lah ban ïada baroh shikatta. Dei halor kata ka nongrim ba ngi sngew ba ka CAA kan nang pynshlur shuh shuh ïa ki mynder ri ba kin wan shapoh ka ri jong ngi,” ong u Bah Samuel ha ka jingïakren bad ki lad pathai khubor.
“Naduh u snem 1947 ba ka ri India ka la ïoh ïa ka jinglaitluid ka thaiñ Shatei Lammihngi ka la ïai shah ba ki bar ri kin wan buhai shnong bad shong shnong bad kumjuh ruh ha u snem 1971 haba la khie ka thma ha ri Bangladesh da ki phew hajar bad da ki lak ki la rung shapoh ka thaiñ Shatei Lammihngi,” u la ong.
“Ka Sorkar India da kaba leh kumne ka nang kwah shuh shuh ba ki bar ri kin long ki trai shnong, ki trai ri trai muluk hangne ha ka thaiñ Shatei Lammihngi baroh kawei, kaba long ka jingma ïa ngi ki ritpaid ym tang ha ka jylla Meghalaya hynrei ha ka thaiñ Shatei Lammihngi baroh kawei,” la bynrap u Chairman ka NESO.
Kum ban shu pyntip hangne ba ka NESO ka la mudui hapoh ka Iingbishar Supreme Court pyrshah ïa ka jingpynlong aiñ ïa ka CAA bad haduh mynta kane ka kam ka dang sah pohding hapoh ka Ingbishar.
Haba kylli u la ong, “ka Sixth Schedule ka kren tang ïa ka riti ka dustur, ka jingpynneh ïa ka khyndew ka shyiap hynrei ka khlem kren ïa ka jingrung jong ki briew kiba nabar. Dei namarkata, ka Sixth Schedule kam pat biang kumba ka long mynta ban tehlakam ïa ka jingwan rung jong ki briew kiba nabar.”
“Ka jinglah ban tehlakam ïa ka jingwanrung jong ki briew kiba nabar ka dei ka Sorkar Jylla bad ka Sorkar Pdeng. Kumba ka long mynta ka jingpyntreikam ïa ka Meghalaya Residents Safety and Security Act (MRSSA) ka Ingbishar High Court ka la pynsangeh bad ïa ka ILP ruh ka Sorkar India ka khlem ai nalor ba la ïai dawa mynta da ki phew phew snem,” la ong shuh shuh u Bah Jyrwa.
Halor ka jingpynslem jong ka Sorkar India ban ai jingmynjur ïa ka Inner Line Permit ha Meghalaya, u Bah Jyrwa u la ong, “ka jingïajngai jong ki jaidbynriew ritpaid ka thaiñ Shatei Lammihngi naduh mynshwa na ka ri India ka dei ka jingleh jong ki hi naduh ka por ba ngi ïoh ïa ka jinglaitluid ngi khlem ïoh ïa ka hok jong ki jylla ka thaiñ Shatei Lammihngi. Naduh ka sngi ba la ïoh laitluid haduh kane ka khyllimat ba mynta kaei kaba ka Sorkar India ka la leh ïa kaba bha ka ban long ka jingïada, ka jingkyntiew ïa ka ktien ka thylliej, ïa ka riti ka dustur bad ban ïada ïa ki jaidbynriew jong ka thaiñ Shatei Lammihngi baroh kawei, tang kawei ruh kam pat don ba kan leh. Kumno ngin ong ba ka Sorkar India ka la leh bha, ka khlem leh eiei ruh em. Dei halor kane ba kane ka jingpynjngai da nang jur nang jur hapdeng ki trai ri trai muluk ka thaiñ Shatei Lammihngi bad ka Sorkar India hapoh Delhi.”