Shillong, Lber 12 : U Myntri Rangbah ka Jylla u Conrad K Sangma mynta ka sngi Ba-ar, ula ong ba ka Sorkar MDA hapoh ka jingialam jongu da lei lei ruh kan ym shah satia ban tih Uranium hapoh ka Jylla Meghalaya.
U la kren ia kane mynta ka sngi ha ki lad pathai khubor hadien ba la mih ki khubor ba kawei ka seng ba la tip kum ka North East Sunshine Trust (India) ka la thoh sha Delhi ban sdang biang ïa ka project tih uranium ha Meghalaya.
“Kino kino ki seng ki lah ban thoh, ngam lah ban khang ïa ki ba kin thoh sha ka Sorkar India hynrei kane kam mut pat ba ka dei ka nongrim ba ïeng da ka Sorkar Jylla namar ka sorkar jylla ka la dep rai naduh mynshwa ban khylliap noh ia kane ka kitab tih Uranium ha Meghalaya” ong u Myntri Rangbah.
“Ngi la kren shai ba khlem ka jingmynjur lang ki paidbah, khlem da khmih lang ïa baroh ki kam ba ïadei bad ka saian, ngin ym shah satia ban tih uranium ha ka Jylla jong ngi” ula ong.
U Myntri Rangbah ula ong ba ka nongrim jong ka Sorkar Jylla ka la shai bha halor kane ka kam namar “Ka dei ka kam iap kam im u paidbah, ka dei ïa ka koit ka khiah u paidbah bad ka dei ia ka lawei jong ka Jylla jong ngi”.
“Ki lah ban don ki jingsngewkhia na ki riew shimet, kiba lah ban kwah ia kane bad don ruh kiba kwah ban pynïaid shakhmat ïa kan, ka dei ïa ka ban hap pynbeit ha ka lynti kaba jai jai bha namar kumba nga ong, ngi hap ban shim lem ïa ka jingmynjur u paidbah, ngi hap ban da pule bniah ïa ki jingktah jong kine ki kam bad dei hadien kine kiei kiei, ngi hap ban pynthikna ba ym dei ban shim ïa ki sienjam ha kane ka lynti (ban tih) namar kumba nga ong, ka dei ka kam ba ktah ïa ka iap ka im u paidbah bad ka lawei ki briew jong ngi” ula bynrap.
Shuh shuh, u Myntri Rangbah ka Jylla ula pyntip ba kam shym la don satia kano kano ka jingphah ktien ne ka jingthoh na ka Sorkar Pdeng sha ka Jylla haba ïadei bad ka kam tih Uranium.
