Phi kloi ban tare ïa ka pisa ha ka por elekshon kane ka long thik kum ka khlieñ kaba jaw shur shur ha ki thylliej ding jong ka kam kangar bor, phi ibang jawdud ïa kaei kaba ki kyrtong MLA ki sam sha kiwei ki para baduk ha ka thaiñ jong phi. Hynrei to kynmaw ban ym klet ïa kawei ba lada phi la tare ïa ka pisa phi la long mraw lypa ! Pei shkor ïa kiei kiba phi la ïohi hapoh ka thaiñ jongphi san snem ki surok jongphi ha ka jaka ba kin long kum ki surok ba jlih jong ka sor hynrei haduh mynta ki dang long kum ki lynti ïaid kali kulai. Kine keiñ ki dei ki jingteh mraw ba phi la teh hi da lade ia lade, phi kmen tohhok ïa ka san spah ka shi hajar ba ki pashat shaphi ha ka por elekshon bad lada ki jop baroh san snem kin imsngi ban khyllie ïa la ka jong ka jinglut bad kamai tam ïa kata. Kumta wat khmih lynti shuh ba ka thaiñ jongphi kan ïoh ïa ka surok kaba bha, ka umbam umdih kaba biang, ka bording, ki skul, ki jaka sumar bad kiwei kiba bun bah ki kam pynroi kiba phi dei hok ban ioh.
Khlem ki kam pynroi khlem pep ki paidbah ki long kum ki briew kiba dang dum bad kiba sah ha ki ri khlaw, ki khynnah bad ki samla kim ïoh ïa ka jingai mynsiem ban kiew shaphrang. Ka jingwan jong ki kam pynroi bunsien ka ai mynsiem ïa ki samla ban long kiba nang bastad ban trei shitom ban nangkiew khnang ba kin ïoh ban long kynrad ha la ka jong ka thaiñ bad ban trei hi ha ki ophis sorkar bad ki tnad treikam kiba don ha ki thaiñ jong ki. Hynrei ka jingbympoi jong ki kam pynroi sha ki paidbah ha ki thaiñ nongkyndong ka pynmyllen ïa ki khynnah bad ki samla ba imat ka jingi jong ki ka long beit kumto kumba ju long. Ki don bun ki shnong ha ki thaiñ nongkyndong kiba wat ha kine ki sngi kiba ka jingstad ka la phriang haduh katta katta, hynrei ka shnong bad ka thaiñ jongki pat ka dang sahdien bad ki long shisha kum ki ri khlaw ba la ieh shrah. Ki paidbah kim shemphang ba ki la kylla long tang kum ki atiar ba lah ban pyndonkam ha ka por elekshon ban pynjop MLA ïano re ïano.
Ki riew shim kabu kim salia ban leh kumta bad ñiew ïa ki briew kum ki mraw bad im sngi ha kaba ïaid pynbieit ïa ki na ka por sha ka por ban shu ïai kawang mit mit ïa ki paidbah ban pynkmen ïa ki. Kitei ki jait Nongmihkhmat kim dei satia ki nongsainhima (Stateman) hynrei ki dei beit ki Nongkhaii (Businessman) bad kim salia ïa kata ka roi ka par jong ki paidbah. Kim dei hi ruh ki briew kiba proh jabieng na ka bynta ka kam saiñ hima sima hynrei ki dei tang ki riew thrangbor ban pynlong mar khaiï wat ïa ki mynsiem briew ruh. Katno ka long shisha kaba i sangsot ban peit ïa kitei ki thaiñ kiba la shah shim kabu ha ki nongmihkhmat wat ban leit sha kitei ki jaka ruh ka shitom namar ba ki surok kim biang yn nai ïakren shuh ïa kiwei ki lad pynroi lei namar ba ka surok hi ka dei u budlum jong ka baroh ki kam pynroi. Phim lah ban ong ba ka thaiñ ka long kaba la roi lada u budlum u long uba anna, lada ki nongmihkhmat kim shym la peit ïa kane ka bynta ka long kaba eh ban ïakren ïa kiwei lei.
Ka jingdon jong ka surok kaba biang ka pynshlur ïa baroh ki kam pynroi ban rung sha katei ka thaiñ naduh ki riew shimet, ki kompeni, ki kynhun trei mon sngewbha bad ïa ki paidbah hi ruh ban trei ban ktah, khaiï pateng bad kumta ter ter. Ki dong bad ki shnong kiba biang ïa ka surok ki long kiba kloi ban ïoh jingïarap lada kidon kano kano ka jingeh bad kiba bun kiwei pat ki jingdonkam. Ki don ki shnong kiba ha ki thaiñ khappud ha ka jingshisha shibun ki kam khaiï bad ki kam pynroi ki dei ban jia hynrei namar jong ka jingjot palat jong ka surok ka thain ka khanglad ia ki kam pynroi ban wan sha ki. Kito ki paidbah ki la kylla long kiba matlah ha ka tyngka jong ki heh spah kiba la pynbieit ïa ki ha ka por elekshon katba mynta pat baroh snem lynti ki la hap ban ïaid lyngba ki surok jot kiba ki kali rit lei kim shlan ban ïaid.
Ki paidbah ki dei sngewthuh ba kum kitei ki jait nongmihkhmat ki kwah ba ki paidbah kin long kiba bieit sah namar kata ka daw ki pynbieit ïa ki da ka pisa bad kim kwah ban trei naka bynta ka jingroi jong ka thaiñ namar ba lada ka thaiñ ka long kaba roi bad kaba stad kitei ki paidbah kin ym jied shuh ïa ki. Katta ki paidbah bapli kim ïohi satia ïa kiei ki buit ba ha lyndet jong ki kyrtong MLA. Kaei ka daw ba la pynkylla ïa ki Businessman ban kwah long politician khambun na kiba la lah ban ïohi ka dei beit tang ban ïoh ïa ka bor bad katno ka long kaba isaitmet ban ïohi ba ki don kiba pyndonkam bakla wat ïa katei ka bor ruh kiba wat hadien ba ki la long MLA ruh ki dang im pat ïa ka jingim kum ki “Gang” kumba la don kiba kynnoh. Namar dei ki paidbah kiba rhah sbai kiba la aibor ia kitei ki jait briew ban long ki nongsynshar jong ki.
Lano keiñ ki paidbah kin lait na katei ka jingshah teh mraw ha ki kam pynbieit, shano keiñ ki khraw pyrkhat kiba sngewkhia na ka bynta ki paidbah. Kane ka la dei ka por ba ki paidbah kin eksamin ia ki kyrtong shuwa ba kin ai marks bad pynjop ha ki ha kane ka elekshon 2023.
