Shillong, Kyllalyngkot 21 : Ka Meghalaya ka la jan kot sha ka jingjop kaba nyngkong ha ka lympung ïalehkai Senior Women’s One Day Trophy hynrei sniewbok la rem noh tang da shi ron ha ka Assam ha ka jingïalehkai ha ka sngi Saitjaiñ ha Nagpur.
Ka Assam kaba la jop ka jingkynting pisa ka la kam ban tied nyngkong ha ka jingïalehkai kaba dei na ka Group C. Dei tang ka Ajima Sangma marwei kaba la lah ban kawang bol bha da kaba khur 5 wicket ai kamai 29 ron, katba ka Anita Lodhi kaba dei ka guest player ka la ïalehkai bha ha ka liang ka tied bol da kaba kamai 80 ron bad ka Sejal Raut da 55 ron.
Haba beh ïa ka thong kaba 215 ron ban jop, ka Raut bad ka Suriti Kumari Ray (30) ki la buh 76 ron ha ka jingduh noh ïa ki ar wicket, ha kaba ka Meghalaya ka la lah ban tied bol bha ha kaba sdang shwa ba ka Ray kan shah pynhap wicket, ka Lodhi kaba la wan ban tied ka la lah ban tied bol naduh ka 18 over haduh ka 49 over.
Da katei ka jingshah pynhap wicket noh jong ka, ka Meghalaya ka sah satang shi wicket bad ka donkam sa saw ron ban jop na ki 11 bol. Ka Meghalaya kaba donkam satang shi ron ban jop na ki ar ron ba dang sah hynrei ka Riticia Nongbet ka la shah pynhap wicket noh ha ka over kaba khatduh, ba la ïoh kem bad kawang bol hi da ka Urmila Chatterjee kaba dei ka thei kawang bol ba khur bun wicket jong ka Assam da 3 wicket ai kamai 44 ron.
Shwa kane, ka Ajima ka la lah ban kawang bol bha ha kaba ka la khur 5 wicket. Ki arngut ki thei tied bol ka Assam kiba kamai shiteng spah ron ki kynthup ka Uma Chetry 58 ron kaba la shah pynhap wicket ha ka Nongbet (2/37) bad ka Jintimani Kalita 78 ron kaba la shah pynhap wicket ha ki kti jong ka Debasmita Dutta (2/44).
Ka Meghalaya kan sa ïakhun pyrshah ïa ka Pondicherry ha ka 25 tarik Kyllalyngkot.
