Tang shu dep ka surok Shillong Airport-Mawlai bypass yn treikam biang ka ISBT Mawlai

Shillong, K’Lyngkot 09 : U Symbud Myntri Rangbah ba dei peit ïa ka tnad Transport ka sorkar jylla, Bah Sniawbhalang Dhar ha ka Sngi Balang u la ong ba ka Inter-State Bus Terminus (ISBT) ha Mawlai Mawiong kan sa treikam pura biang hadien ba ka surok ba shna thymmai na Mawlai Bypass sha Shillong Airport kala dep ïa kaba la buh thong hapoh une u snem.
“Ngi la ïai pynkynmaw ïa ka tnad PWD ba kan pyndep noh ïa kane ka surok thymmai kham kloi bad mynta ki la leh ïa kane. Kumta mardor mar ïa dep kane ka surok na Mawlai bypass, ki lah ban pyndonkam biang kumba ju leh,” ong u Bah Sniawbhalang haba kren bad ki lad pathai khubor.
Katkum ka jingong jong u Symbud Myntri Rangbah, ïa katei ka surok ki buh thong banpyndep la kumno kumno shwa ban kut jong une u snem.
“Ngi ju shong ïa ki jingïalang bad ka tnad PWD bad ngi la kyrpad ïa ki ba kin pyndep noh kham loi ïa ka,” u la bynrap biang.
Halor ka jingkynnoh ba ka don ka jingpyndonkam bakla ïa ka ISBT da ki riew runar, u Symbud Myntri u la ong ba na ka liang ki ophisar ka tnad na ka por sha ka por ki ju leit ban jurip bad kumta haduh mynta kam pat don kano kano ka kaiphod ba kin don kum kita kiba pyndonkam bakla ïa ka ISBT.
Na ka liang u Symbud Myntri Rangbah u la ong ruh ba ka sorkar kam kwah satia trei na ka bynta shipor hynrei ka kwah ba ka sienjam kan long beit shi rta kata da kaba shna da kawei pat ka surok.