Shillong, Jylliew 22: Ka Seiñ Jaiñtia Women’s Wing Shillong ka la pynkup burom ïa ka Padmashri kong Silbi Passah bad kumjuh ruh ïa i heprit Mansa Najiar iba dei i nongthoh kot ba dang khynnah tam ha ka jylla ha kaba ïa kane ka prokram la pynlong ha Seiñ Jaiñtia Hall, Qualapatty, Shillong ha kaba u Myntri ka tnat Social Welfare ka Sorkar Jylla u Bah Paul Lyngdoh u la long u kongsan.
Ha shwa ban pynkup burom ïa kitei ki arngut kiba la wanrah burom ïa ka jylla, u Bah Paul Lyngdoh u la ong ba ka jylla kaba dang don tang hapoh ki 183 snem ka la lah ban ïoh ka jingithuh hapoh ka ri India wat la kiwei ki jaitbynriew ki la khambun snem ban ïa ka jaitbynriew Khasi bad Pnar.
“Ka Jylla jong ngi ka la ïoh ki riewkhraw kum u Chief Election Commissioner u Bah J M Lyngdoh, nangta u Chairman barim ka Union Public Service Commision of India u Prof. David R. Syiemlieh bad mynta ngi la ïoh ïa i kong Silbi Passah i ba la ïoh ka khusnam Padmashri bad kumjuh ruh i heprit Mansa Najiar iba dei i nongthoh kot ba dang khynnah tam ha ka jylla,” ong u Bah Paul bad ai ka jingïaroh ruh ïa ka Seiñ Jaiñtia Women’s Wing kiba la pynlong ïa kane ka prokram kaba kongsan.
U la bynrap shuh ba tang ha kine ki 183 snem ka jylla ka la ïoh ruh ïa ki riew donsap. “Nga khot ïa ki paralok Pnar kiba sah ha Shillong ba kin ïatreilang ban kyntiew ïa ka imlang sahlang.”
Ha kane ka sngi na ka liang u Bah Paul Lyngdoh ban ai ka jingïarap pisa kaba T. 10 lak sha ka Seiñ Jaiñtia ba kan nang lah ban pyntyllun ïa ki kam ban kyntiew ïa ki kam ki ban tei ïa ka imlang sahlang bad khamtam eh ha ka pule puthi kaba ka la buh ha kane ka jaka.
Ha kane ka sngi ïa ka keynote Address la ai da u Bah Wanjop Pyrbot President ka Seiñ Jaiñtia ha kaba u la ong ba kane ka jingïoh khusnam i Kong Silbi Passah ka la wanrah ïa ka jaitbynriew Pnar.
La ïoh ka jingkren na i Kong Silbi Passah bad i heprit Mansa Najair nalor ka jingdon ki prokram kum ka jingshad ki nonghikai ka Seiñ Jaiñtia HSS bad kumjuh ruh ka jingrwai na ki dkhot ka Women’s Wing ka Seiñ Jaiñtia.
