Dawa ka VPP ban kem noh mardor ïa ki shipai BSF ba thombor ïa ka longïing ha Kuliang

Khliehriat, Jylliew, 22: Ka Voice of the People (VPP) Narpuh Circle ha ka sngi Thohdieng ka la dawa ïa ki bor synshar jong ka East Jaiñtia Hills District ban kem mardor ïa ki shipai BSF kiba donkti ban thombor ïa kawei ka longïing ha ka shnong Kuliang.
Ka President jong ka VPP Narpuh Circle Kong Deiwi Tongper ka la aiti da ka ujor ha u Deputy Commissioner jong ka East Jaiñtia Hills District bad kyntu ba dei ban kem noh mardor ïa ki shipai BSF jong ka 172 Battalion kiba thombor ïa ka longiing jong ka Kong Matina Pohshna nalor kaba pynmynsaw ruh ïa u kurim bad jrongkti ruh wat ïa ka khun kynthei.
Ha ka ujor ka VPP ka la ong ba ki shipai BSF ha ka jaka ba kin ai ka jingïada ïa ki paidbah hynrei ki thombor pynban, ki long pynban ka daw ka jingtieng jingsyier ïa ki paidbah ha ki thaiñ khappud bad ki la shu kynnoh nongkhaïi beaiñ ïa ki paidbah.
“Ki briew jong ngi ha khappud ki mad jingeh na ki jingshah thombor na ka por sha ka por bad ha kane ka kynti lei ki la jrongkti ruh wat ïa ki kynthei khynnah. Ki shipai ki la thombor ïa ka kmie bad pynmynsaw ïa u kpa bad jrong kti ruh ïa ka khun kaba dang 15 snem ka rta, ha ka jaka ba kin leh ïa ka kamram ban tehlakam ïa ka jingrung tuh jong ki briew kiba nabar ri hynrei ki pynjynjar, ki thombor pynban ïa ki nongshong shnong bad kane ka dei kaei kaei kaba ngim lah ban pdiang kum ka party.”
Halor kane ka jingjia, ka Kong Martina Pohshna ka la ujor ruh da ka ejahar ha Umkiang Patrolling Post bad la register case ïa kane ka jingujor ha Khliehriat Women Police Station.
Kum ban shu pynkynmaw, ka Kong Martina Pohshna, na ka shnong Kuliang East Jaiñtia Hills District, ha ka 20 tarik mynta u bnai ka la ujor da ka ejahar pyrshah ïa ki shipai BSF kiba la thombor ïa ka bad ïa ka ïing ka sem ha iingsah jong ka ha Kuliang.
ïa ka ejahar la rejistar ha Umkiang Patrolling Post. Kumba paw ha ki dur khih (video) la ïohi ba ki shipai ki la thombor bad byrngem ruh da ki ‘tiensih ‘tiensang.
Ka Kong Martina ha ka ejahar ka la pyntip ba ha ka miet 19 tarik, jylliew, 2024 ha ka por 11.30 baje mynmiet lai ngut ki briew ba khlem phong Uniform kiba la kam ba ki dei ki shipai BSF ki la kynjat bad pynpait da ka bor ïa ka jingkhang ïing nalor ba ki la ktah kti sa ïa u kurim jong ka u Bah Shanroi Lyngkhoi uba dang shah sumar mynta ha Khliehriat Civil hospital, ki shipai ki la patan ïa u shabar bad ki la bom la shoh haduh ba la kdiah ki shyieng krung, watla ka la pyrshang ban ïada ïa u kurim hynrei kam lah namar ki la thombor shaba palat. Shuh shuh ka la ïathuh ba ha kane kajuh hi ka miet hi ki shipai BSF ki la wan ban thom bor biang sa ha ka por 12.30 baje mynmiet ha kaba ki la patrong bad kynjat ïa ka bad jrongkti ruh ïa ka khun kynthei.
Halor kane ka jingjia, ka Kong Martina ka la kyntu ïa ki bor jong ka aiñ ban kem ïa ki shipai BSF hynrei haduh mynta ki Pulit kim pat kem satia ïa ki shipai BSF kiba donkti ha kane ka jingthombor.