Jowai, Risaw 16: U District Magistrate ka West Jaiñtia Hills ula pynmih ïa ka hukum hapoh ka Section 163 BNSS, ba la ai jingbit ban pynbthei bom pataka ha ka Diwali tang hapoh ar kynta, kata, naduh ka por 8:00 baje mynmiet haduh ka por 10:00 baje mynmiet.
Kane ka hukum ka la khang pyrshah ban die bad thied ïa ki bom ba la shna na shabar ri ne pyndonkam ïa ki bom ba shna lang bad ki siris kiba lah ban pynjaboh ïa ka lyer bad ïa ka mariang. Ka jingpyndonkam ïa ki bom kiba pynmih jingsawa ka dei ban long 125 dB (A1) lane 145 dB (C) pk ha ka jingjngai kaba 4 meter na ka jaka ba pynbthei.
Kane ka hukum ka khang pyrshah ruh ban pynbthei ïa ki pataka hapoh 100 meter na ki jaka sumar, ki jaka pule, ki ïingbishar, ki jaka leh ñiam ne kino kino ki jaka kiba la pynbna kum ki Silent Zone da ki bor ba dei peit.
Ka jingdie ïa ki pataka dei ban da ïoh jingbit ne ka laisen na ka ophis jong u Deputy Commissioner, West Jaiñtia Hills District, lyngba ka jingbthah jong ka Central Pollution Control Board.
Kane ka hukum kan treikam noh mardor tad haduh ban da kut ka jingrakhe ïa ka Diwali.
