Shillong,. Risaw 16: U Myntri Rangbah ka jylla u Conrad K Sangma ha ka sngi Palei ula pyntip ba dei tang ka jylla Meghalaya ha ka thaiñ Shatei lam Mihngi kaba kyrshan ïa ki skul shimet.
U la ong, “Ngi la pynlut T.1967 klur ha ka tulop ki nonghikai ba kynthup ïa T.684 klur ïa ki nonghikai skul Sorkar bad T.917 klur ïa ki tulop ki nonghikai adhoc bad jingkyrshan lyngba ki grant in-aid. Ym don kiwei pat ki Jylla ha ka thaiñ shatei lammihngi kiba kyrshan ïa ki skul shimet lyngba ki grant in-aid.”
Ïa kane u Conrad u la ong haba ai jingkren ha ka jingïalang pynhab pyrda ïa ka Platinum Jubilee Celebration ka Nongkrem Govt Upper Primary School ha East Khasi Hills ha ka sngi Palei.
Na ka liang jong u, ula pyntip ruh ba ka Sorkar ka la kyrshan palat 4000 tylli ki skul shimet ha Meghalaya lyngba ki grant in-aid.
“Ka jingmih na kine ki jingkynshew kam poi satia ha ka kyrdan kaba ngi kwah. Ka pisa kam dei ka jingsngewkhia, hangno ba ngi ïaid bakla?. Balei ngim lah ban kyntiew ïa ka jingjanai ka pule puthi ha ki skul jong ngi?. Ngi la nang trei suki suki ban pynjanai ïa ka pule puthi. Katba ngi nang jam shakhmat, ngi dei ban ai jinghikai ïa ki nonghikai jong ngi khnang ba kin lah pynbiang ïa ki kyndon ba la buh kum ki nonghikai ba la biang kyrdan,” ula bynrap.
U Myntri Rangbah ula ai khublei ïa ka skul halor ka jingïaid lynti ba la 75 snem, haba ai jingithuh ïa ka synniang jong ki principal ba la leit noh, ki nonghikai bad ki samla pule ha kaban pynwandur ïa kane ka skul kumba ka long mynta.
U Conrad u la ong ba ka jingkiew shakhmat jong ka jylla ka shong eh ha ka jingdon ki nongshong shnong kiba bit ba biang nadong shadong.
Haba iadei bad ki jingeh ba ïakynduh ha ka kam pule puthi, u Myntri Rangbah ula kren halor ka jingkongsan ki jinghikai pyntbit ïa ki nonghikai bad ka roi ka par ïa baroh lang. Haba shim ïa ka proverb ki China ula ong, “Ka jingkynshew ha ki briew ka ai ïa ka jingmyntoi kaba slem bha bad ka jingsaiñdur ïa ki samla pule kan ai ka jingmyntoi ka ban neh shirta.”
Ha kaba ïadei pat ba ka jingdawa ban kyntiew kyrdan ïa ka skul sha ka Secondary & Higher Secondary, ula pyntip ba ka Sorkar kan donkam ïa ka jingïasyllok halor kane ka kam, haba kular ba kane ka skul kan ïoh ïa ka jingkyrshan ban sdang ïa ka smart classroom bad ka computer room na ka Chief Minister Special Development Fund (CMSDF).
Na ka liang jong u, ula pyntip ruh ba un sa ai ïa ki tiar put tiar tem sha ki khynnah skul kaba long kum ka dak ban pynshlur ïa ki ha ka put ka tem.
Ha kane ka sngi, u Myntri Rangbah ula pyllait paidbah ruh ïa ka kot sah kynmaw ne souvenir jong ka platinum jubilee kane ka skul.
Na ka liang u Bah B J Kharshandi, Director, Directorate of School Education and Literacy (DSEL), ha ka jingkren u la ïaroh ïa ka skul ba ka la pynneh ïa ka jingpule kaba bha wat hapdeng ka jingdon kaba 128 ngut ki khynnah skul bad ka jingdon jong ki 12 ngut ki nonghikai, ba kynthup ïa u headmaster.
U Bah Kharshandi u la pynpaw ïa ki 3 tylli ki point kiba kongsan, kiba dei halor ka jinglong kaba bha ka pule puthi, nangta ka jingthep kam ïa ki nonghikai kiba la tbit ha ki skul sorkar, bad ka bynta kaba kongsan bad ka jingaiti jong ki nonghikai ban pynthikna ba ka pule puthi kan bha sha baroh ki khynnah.
