Shillong, Risaw 16: Ka bor pynïaid district jong ka East Khasi Hills ka la pynmih ïa ka hukum ban shah shipor ïa ki dukan kiba don ha ka thaiñ Mahadev Khola Dham, 101 Area Laban, Shillong, ba kin plie biang bad kane ka hukum kan treikam noh mardor.
Kane ka hukum ba la pynmih da ka District Magistrate (DM) ha ka 15 tarik mynta u bnai, ka la mih hadien jong ka jingkyrpad bad ka dorkhas kaba la ïohpdiang na u General Secretary ka Mahadev Khola Welfare & Trust, u Homnath Gautam.
Kane ka hukum ka dei ruh halor ka dorkhas kaba kham mynshwa ka 5 tarik u Nailur, 2025, bad kaba kdew ruh ba ka rai kaba khatduh jong ka sorkar halor kane ka kam ka dangsah teng. Ha kane ka hukum kaba tang shipor, la ong ba ka District Magistrate (DM) ka long kaba bit ban shah ïa kine ki dukan ba kin plie biang tat haduh ban da pynbna da kumwei pat.
“Haba bud ïa kane ka hukum bad kumjuh ruh ka dorkhas kaba 5 tarik u Nailur, 2025 bad halor ka jingkyrpad kaba 13 tarik mynta u bnai, 2025 bad ka dorkhas kaba 13 tarik mynta u bnai ba la ïohpdiang na u General secretary jong ka Mahadev Khola Welfare & Trust u Homnath Gautam bad ka jingsah teng ka rai jong ka sorkar ban pynmih ïa ka hukum, kumta ha ki dukan kiba don ha ka thaiñ Mahadev Khola Dham, 101 Area Laban, Shillong la shah ba kin plie biang mardor tat haduh ban da pynmih da kiwei pat ki hukum,” ong ka hukum na ka DM.
