Khliehriat, Risaw, 15: Ki Pulit jong ka Khliehriat Police Station ha ka Lah Sngi u Blei mynta ka taiew, ki leit shimti ïa kawei ka met ïap ba la pyut bha jong uwei rangbah na kawei ka thliew tih dewïong ka bym shym la pyndonkam shuh kaba don ha ka thaiñ Moolait Bri sutnga, East Jaiñtia Hills District.
Ki Pulit ki la ïathuh ba ki nongshong jong ka thaiñ Moolait Bri Sutnga ki la lap ïa ka met ïap ka la pyut bha bad ka bym lah shuh ban ithuh durkhmat kaba la per ha sla um ha kawei ka thliew tih dewïong bym pyndonkam shuh. U Waheh Shong jong ka shnong Moolait Bri-Sutnga u la pyntip ïa kane ka jingjia sha ki Pulit.
Hadien ba la sei ïa ka met ïap na um la leh ruh ïa ka postmortem ha kane hi ka jaka da u SDM & HO, Khliehriat u Dr. W. Bamonbad ryngkat ka jingsakhi lang jong u Block Development Officer (BDO) ka Sutnga Saipung C&RC Block, uba dei ruh u Executive Magistrate, u Dr R.Pyrtuh. Hadien kane, ïa ka met la rah noh da ki Pulit ban buh ha ka jaka buh metïap ha Khliehriat Civil Hospital, Khliehriat.
Ki Pulit ki suba ba ka metïap ka lah ban dei jong u bar jylla uba don hapdeng ka rta 45-50 snem, uba phong da ka patlun jrong rong grey, ka patlun poh rong stem, ka sopti poh rong pink, ka jacket rong iong bad ki juti plastik.
