Takraiñ ka VPP ba jot rathai ka surok National Highway -6 khamtam ha sor Khliehriat

Khliehriat, Nailur, 15: Ka long shisha kaba i sangsot bad ka la long ruh kaba i jah burom ba ka sor bah Khliehriat kaba dei ka district Headquarter jong ka East Jaiñtia Hills District ka bym i dei shuh kum ka Head Quarter namar ka jingshah iehnoh beiñ ha ka sorkar bad ka NHAI ka la paw pen ryngkew khamtam ha kaba iadei bad ka jinglong jingman ka surok kaba la i kum ka surok khlaw, ki paidbah kiba iaid ba ieng, kiba die dukan ha rud surok bad ki khynnah skul kiba iaid lynti ha Khliehriat ki la hap ban bam da ka khyndew pum pum man la ka sngi bad kane ka buh jingma ym tang ha ka iaid ka ieng hynrei ka buh jingma ruh ïa ka koit ka khiah jong ki paidbah.
Ka la don ka jingdheng kali kaba khah khah ha Khliehriat bad bun ki Kalo ki hap pynieng ha surok namar ba ki la sniew bad kane baroh ka dei namar ka jing sniew palat ka surok kaba bun sa tang ki thliew ki syar kiba heh-ba heh.
Na ka liang u nongialam ka Voice of the People Khliehriat Circle, u bah Damewanhi Rymbai, haba kren sha ki pathai khubor, u la pynpaw ka jingsngew khia kaba khraw halor ka jingsniew palat ka surok ha sor bah Khliehriat, kumta halor kane u la ong ba ka party hi kan sa pynlong da ka jingïalang paidbah ha madan Teilang Play Ground ha Dkhiah West ha ka 18 tarik mynta u bnai ha ka por 11 baje bad ki paidbah kin ïa ai jingmut lang ha kaba iadei bad kane ka jingshah iehnoh beiñ ka district ha kaba iadei bad ka surok kaba la jot la pra bad ka party kan ieh ruh ha ka rai jong u paidbah bad yn shim ïa ka rai ha katei ka sngi hi kaba dei ka rai jong u paidbah.
Utei u nongïalam ka VPP na ri lum Jaiñtia, u khot bad wer ïa baroh ki paidbah naduh ki kynhun sengbhalang, ki seng samla, ki seng longkmie ba kin sngewbha ban ïa poi lang sha katei ka jingialang.
Ha kajuh ka por u bah Damewanhi, u la iathuh ruh ba na ka laing ka party ka la pyrshang bad iakren bad ki bor kiba halor, kumjuh ruh ki sengbhalang, ki synjuk waheh shnong ki la dep kren bad pynpaw sha ka sorkar hynrei la iohi ba haduh mynta ka sorkar ka dang leh lyndet ïa kane, kam sngap bad kam patiaw eiei, katba nang iaid ka por ka surok ka la nang sniew ki jingjia kiba sngewsih ki la nang jia, ka jingkylla ki kali, ka jingiatyngkhuh kali ka ju jia khah khah bad kane ka buh jingma ïa ka iaid ka ieng jong ki paidbah “Haba peit ïa ka surok ha district Head-quarter shisha ka la long kaba i lehraiñ bad shathie sha rum ruh kumjuh hi haduh ban da poi sha khappud Assam ruh ka jingsniew ka surok ka la long shaba palat”
U bah Damewanhi u la iathuh, “ka la don ka jingbthei taïar ha surok hajan ïew Khliehriat bad la sied lut ka ktieh, ki maw sha ki briew kiba iaid lynti, donbok ba ym don ba mynsaw, te lada dei ha ka por ba slap ruh ki paidbah ki mad ïa ka jingktieh jingjyrsieh kaba jur bha bad lada dei ha ka por ba rang ba rkhiang ka bneng ruh ki paidbah ki mad ïa ka pum pum khyndew kaba jur, kumta kane ym dei ba ka ktah tang ïa ka leit ka wan, hynrei ka ktah ruh wat ïa ka koit ka khiah jong ki paidbah, ki nongmihkhmat kim dei ban shu aili than ïa ka sorkar, ym tang shu ai jingmut ne ban shu kren ïa ka sorkar, hynrei ki dei ruh ban mih shakhmat bad lada ka sorkar kam sngap hato kim lah seh ban ïalam ïa ki paidbah ban thaw da kino kino ki lad kiba lah ban pynkohnguh ïa ka sorkar, namar ki paidbah ki la dep jied ïa ki ba kin ïasaid bad ba kin iakren ïa ki jingeh jong ki paidbah namar la i sangsot shisha ïa kane ka jingshah ieh beiñ ki paidbah ha ka sorkar.”