Jowai, Nailur, 15: Kawei na ki kynhun kaba peit ïa ka bha ka miat bad ka jingshngaiñ haka imlang ka sahlang ïa kaba la tip kum ka Bouncers Association of Meghalaya (BAM) Jaiñtia Hills, hynnin ka sngi 14 tarik kala leh burom ïa ka jingshakri kaba la kynjoh 3 snem bad ha kane ka sngi la pynbam smai ruh ïa ki nongkitkam ba thymmai naka bynta u snem 2023-2024.
Ïa kane ka jingrakhe dap lai (3) snem ka BAM-JH la pynlong ha madan ka Bosco Pnar Jowai, ha kaba u OC ka Jowai Police Station ma S. Mannar ula long kum u kongsan, ha ka jingdonlang u symbud kongsan ma Iahmioo Khyriem, u President BAM Central Body Shilliong bah Junestar Kharbuli, u Johnny Nongrum (Boxer), ki dkhot ka BAM-JH nalor kiwei de kiba la shah khot sngewbha.
La ïathuh ba ïa BAM-JH la seng ïa ka haka 14 tarik Nailur, 2020 ha nongbah Jowai bad lyngba ka jingdon kane ka BAM-JH kala plie lad ïa ki khun samla ban ïoh kam ïoh jam bad ha ka juh ka por ka ïarap ïa ki khun samla ban lait na ki jingsniew kiba ha rukom haka imlang ka sahlang.
Na ka liang u President ka BAM-JH ma Yoosar Kynjing uba dei ruh u nongseng ïa kane ka Association hapoh Ri-lum Jaiñtia, u ong ka jingwan jong kane ka Bouncers Association of Meghalaya (BAM) hapoh ka District kan ai mynsiem shibun eh ïa ki khun samla jong ka Ri-Lum Jaiñtia namar haduh mynta ki dkhot Member kila don kumba 200 tam.
U kongsan jong kane ka sngi haba ai jingkren ula ai ka jingïaroh ïa nongkitkam ka BAM-JH kiba la aiti met bad mynsiem ha ka kam ban ai ka jingïada na ka bynta ka jingshngaiñ.
U ma S. Mannar ula pynpaw ka jingsngewkmen haba don kum kane ka seng hapoh ka District bad kala long ka jingïarap shibun eh haba don kino kino ki prokram shimet, ula kyntu ba lyngba jong ki dkhot jong ka kin long ka nuksa ïa kiwei, ha kaba juh ka por ula pyntip ba kane ka kynhun kala ïarap shibun eh ïa ka tnad pulit ha kiba bun ki bynta.
Shuh shuh ula ong jingwan pynïasoh ki khun samla kum ki dkhot jong kane ka seng kan pynlait ïa ki khun samla ka District ban ngop ha ki kam sniew ne ki jingdih kiba ha rukom.
Ha kane ka sngi la pynbam smai ïa ki nongkitkam ba thymmai ka BAM-JH naka bynta u snem 2023 & 2024 kiba long kumne President Mr. Yoosar Kynjing, Working President Mr. Ram Passah, Asst Vice President Mr. Bakhraw Kupar Sumer, General Secretary Mr. J. Lonel Passah, Asst. General Secretary Mr. Jasmin Dkhar, Publicity Secretary Mr. Wandame hi Kynjing.
Ha ka Women’s Wings la jied President da ka Miss. Corita Langbang, Working President Miss. Samhaka Dkhar, Vice President Miss. Lasubon Shadap, General Secretary Miss. Rihokmika Sumer bad ka Asst. General Secretary Miss. Jenefar Lyngdoh.
La pynshong shit shuh shuh ïa kane ka sngi da ki jingrwai, ki jingshad na ki dkhot ka BAM-JH bad ka jingpyni dohksah na ki nongjop haka Mr. Ironman Amateur Championship 2023 kata na u Amos Dkhar uba la ïoh ha ka 4 place Denim Jeans Model, ka Sawakani Lakiang haka 3 Place Women’s Fitness bad u Punioladmiki Pala uba jop haka Over All Men’s Physique jong ka Mr. Ironman Amateur Championship 2023.
Hashwa kane la don ruh jingïaid Mass Pass da ki dkhot ka West bad East Jaiñtia, la ïoh ruh ka jingduwai na u Dayooki Sumer katba ïa ki kyntien ai khublei la ïoh na ka Rihokmika Sumer.
