Donkam ban buh sa kawei ka bank ha Ranikor, kyntu ka KSU ïa u MLA ban phai khmat lem

Mawkyrwat, ‘Nailur 15: Ka Khasi Student’s Union (KSU) jong ka Ranikor Circle mynta ka sngi ka la hiar jurip ïa kawei na ki tnad treikam kaba dei ka jaka pynlang pisa (State Bank of India) Ranikor Branch na ka bynta ka jinglong jingman bad ïa ka rukom treikam jong katei ka ophis.
Ïa katei ka jingleit jurip la lam khmat da u Siril Langte, Vice President bad u Orisstar Langte, General Secretary jong ka KSU Ranikor Circle bad ka jingleit jong ki ruh ka dei hadien ka jingmih jong ka video ba la ïoh ring-dur lyngba ka Closed Circuit Television (CCTV) jong ka State Bank of India, Ranikor Branch ha kaba ka la don ka jingïaknih rung jong ki paidbah kaba la i shyrkhei ban peit bad wat ïa u nongap pahara jong katei ka bank ruh u la jan shah ïuh ha ki paidbah.
Ha kane ka sngi la ïoh ruh ban ïa kren bad u Branch Manager jong ka State Bank of India, Ranikor Branch ha kaba na ka liang ka seng ha kane ka jingïakren la ong ba ka la lap shibun ki jingduna ha kaba ki nongtrei ki don tang 6 ngut, katba ki shnong kiba ïa treikam bad katei ka bank ki don haduh 150 tylli ki shnong.
“Ka jingai jingshakri jong kane ka bank ka la long kaba la eh palat, nangta ka bording ruh kam biang, bad kaba kongsan tam ka dei ka jingbym biang jong ka network kaba la pyndkoh shi katdei ïa ka rukom treikam”, ong ka kyrwoh na ka seng. Namarkata, ka seng ka la pynpaw ïa ka jingsngewkhia bad jingsngewsynei shisha ïa u Branch Manager ha kaba ma u u hap ban trei kam lang bad ki staff kaba um ju ïoh ban shong ha ka kamra treikam jong u kumba u dei ban shong.