Ka KNGC kawei napdeng ki 5 tylli ki College hapoh ka North East ban sdang ïa ka ITEP
Dap 57 snem ka jingshakri jingnang jingstad
Jowai, Nailur 15: Kawei na ki jaka pule (College) sorkar hapoh ka Ri-Lum Jaiñtia kaba la ai jingshakri haka liang ka jingnang jingstad na ka bynta ban seng dur ïa ka lawei ki samla pule kata ka ‘Kiang Nangbah Govt. College’, Jowai mynta ka 15 tarik u Nailur kala rakhe ïa kane ka sngi “57th Foundation Day” haka jingïalang ba la pynlong ha Auditorium jong katei hi ka College.
Ïa kane ka jaka pule (Collage) la seng ïa ka naduh ka 15 tarik u Nailur, 1967 bad ka College kala sdang ban ïaid lynti haka jingshakri ïaka pule ka puthi bad dei haka snem kaba buh 1968 kala ïoh ïa ka jaka ba pura haka jingheh kaba 31.11 acres, ha kaba 6.892 acres la ai sha ka Polytechnic bad mynta ka don 24.218 acres.
La ïathuh da ka Principal jong katei ka College ka Dr. (Mrs.) E. M. Blah ba ka ïa ‘Jowai Govt. College’ la pynkylla ïa ka kyrteng jong ka haka snem 1983 da kaba ai burom ïa uwei na ki Khlawait ka Ri Rum Jaiñtia u “Kiang Nangbah”.
Kumta ha ka snem 2021 lyngba ka jingtrei shitom jong ki nonghikai (Lecturer) bad ki samla pule la ithuh (Accredited) ïa ka College lyngba ka NAAC ha ka (Grade-B) bad kala long ka College ba nyngkong ba ïoh ïa ka jingithuh hapoh ka jylla.
Hadien ka jingithuh na ka NAAC na ka liang ka College kala ïoh ban apply shibun ki Courses kum ka BA BEd, BSc Bed. Ka dei ruh kawei napdeng ki san (5) tylli ki College napoh ka North East ba la ithuh da ka NCTE ban sdang ïa ka Course Four-Year ‘Integrated Teacher Education Programme’ ITEP bad ïa kane yn sdang naka bynta ka Academic Session 2023-2024.
Ha kajuh ka por ka College kala ïoh jingïarap ruh naka Rashtriya Uchchatar Shiksha Abhiyan (RUSA) bad kane kala ïarap shibun eh ïa ka College ban ai ka jingshakri ïaki samla pule kaba khambha ha ki snem ban wan.
Ha kane ka sngi la ai khusnam ruh sha ki lai ngut ki nonghikai (lecturer) kiba la kynjop 25 snem ka jingshakri kata u Dr. (Mr.) J. P. Sharma (Deptt. of Philosophy), Smt. S. M. F. Blah (Deptt. of English) bad Shri L. D. Lyngdoh (Deptt. Of Chemistry). Kymjuh ruh ïa ki ar ngut ki samla pule kiba la ïoh Toppers ha ka Botany bad Mathematics kata ïa i Salansi Pohleng (Bsc. Mathematics) bad Shandakabiang Suchiang (Bsc. Botany)
La ïoh ruh ka jingkren ha kane ka sngi na u Dr. (Mr.) S. R. Lyndem bad Dr. (Mr.) J. P. Sharma. La pynshong shit shuh shuh ïa kane ka sngi da ki jingrwai ba la thaw hi da ki samla pule ka College, ki jingshad nalor kiwei kiwei de bad la pynkut ïa ka prokram da ka jingrwai National Anthem bala lam khmat da ka NSS jong ka College da ka jingïashim bynta lang ki Nonghikai bad ki samla pule jong ka College.