Shillong, Nailur, 15: Na ka bynta ban lah ban trei khambha bad janai ha ka por ba wan lynshop ki bor mariang hapoh ka ri India bad ha ka jylla Meghalaya bad da ka jingthmu ban pynduna ïa ka jingduh ïa ki jingim briew bad ïa ki jingdon jingem da kaba pynkhlaiñ ïa ka Disaster Response Mechanism, ka National Institute of Disaster Management (NIDM), Ministry of Home Affairs ryngkat ka jingïatreilang bad ka Meghalaya State Disaster Management Authority (MSDMA) bad Meghalaya Administrative Training Institute (MATI) ki la pynlong ïa ka Training Programme kaba 4 sngi halor ka Incident Response System (IRS): Basic & Intermediate ha MATI, Shillong.
Ha katei ka training la wan ban ïashimbynta da ki nongmihkhmat na ki District Disaster Management Authorities, ki ophisar jong ki tnad sorkar, ki nongmihkhmat na ka Meghalaya Police bad kiwei kiwei.
Ka Secretary jongka tnad Revenue and Disaster Management bad ka Executive Director, State Disaster Management Authority, ka Kong Matsiewdor War Nongbri, haba ai jingkren ka la ong watla ka ri India ka la lah ban pynïaid beit ïa ki kam ki jam ha ka por ba don ki lanot ha ki snem kiba la leit, hynrei ki la don pat ki jingduna bad ki jingdkoh ïa kaba donkam ban shim khia bha hynrei ka rukom ai jingïarap mynta ka long kaba biang bha kaba sted bad kaba la pynkhreh bha lypa.
Ka la ong ba ka sorkar pdeng ka thrang ban pynthikna bad shim khia ïa kitei ki jingduna da kaba wanrah ïa ka Disaster Management Act, 2005. Kane ka aiñ ka la wanrah ïa ka jingkylla ha kaba ïadei bad ka jingai jingïarap bad jingïada haba jia ki jingwan lynshop ka bor mariang.
Ka la ong, ba la lah ban long kiba la pynkhreh ban ai jingïada ïa kino kino ki jingjia, ban pynduna bad ban pynkhreh lypa ïa ki sienjam ha ka ban pynïaid ïa ki kam ki jam.
Ka Kong Nongbri ka la ong ba ha ka jingwan lynshop ka khlam COVID-19, ka jylla ka la mad ïa ki jingduna khamtam ha kaba ïadei bad ka jingkheiñ jingdiah namar ba ka jingpynbit pynbiang ka dei kaba la shu pynkhreh hak-dak khlem da don kano kano ka jingai jinghikai, ka jingdkoh ha ka rukom pynkhreh ban pynïaid shakhmat ïa ka kam bad ka jingbymshai ha ka rukom don ïa ki ban khlieh ban pynïaid bad ban bynshet lypa ïa ki kamram ha ka Response Team.
Ka la ong, ba ka long kaba donkam kyrkieh ban don ïa ka Response System kaba thikna bad kaba la pynkhreh bha bad ban bynshet lypa ïa ki kamram ha man la ki dkhot jongka response team, ka rukom treikam kaba pura bad kaba ïaid ryntih bad ka ban don ïa ki khliehduh kin ai ïa ki jingbthah bad ban pynïaid ïa ka kam.
Ka Kong Nongbri ka la ong, ba ka Response System ka long kaba kongsan bha namar ba ka ïoh ban trei ne leh mardor ïa kano kano ka jingjia bad ban buh ruh ha ka kyrdan kaba skhem ban pynthikna ba kan ym ïarap tang ïalade hynrei ban ïarap lang ïakiwei ruh.
Ka la pynpaw ïa ka jingkyrmen ba lyngba katei ka training programme kan ai jingmyntoi ïa baroh ki nongïa shim bynta khnang ba kin lah ban leh da ki kam ha ka por ba donkam bad ka la kyntu ïa ki nongïashim bynta ba kin ai ïa ki jingai jingmut bad ïa ki jingtip, khnang ba yn lah ban lah ban pynrung ha ka Disaster Management Plan jong ka jylla.
U Shekhar Chaturvedi, Asstt. Professor, Division of Disaster Response & Recovery, NIDM, Delhi, ula ai jinghikai kyrpang ha katei ka training programme ha kaba ïadei bad ki lad ki lynti ban shim haba wan lynshop ki bor mariang ha kaba la ai jingkyrshan ïa u da u Arun Verma jongka Centre of Mass Congregation & Transport related Disasters, Division jongka Disaster Response & Recovery, NIDM, Delhi.
