Khliehriat, Naiwieng 12: Ka lympung ïalehkai jong ka kyrdan Super Division Football Tournament 2023 kaba la long ha kane ka sngi saitjaiñ jong ka taïew ba ladep ha madan Deinchynrum, EJHD bala pynïaid da ka East Jaiñtia Hills District Football Association (EJHDFA).
Haba phai sha ka jingïakhun kaba nyngkong na ka liang ka kynhun ïalehkai jong ka Sutnga SSCC ka la khur ïa ka namjop hadien ba ka la pynjemkhnap haduh 4-0 kol ïa ka R.Wahshnong SC.
Ka namtam ka la leit sha u Onio Sutnga u ba la khyrwit lai kol na bynta ka kynhun (5, 45+3 & 87), katba ka shi kol pat ka la wan na u Ioanis Suchen ha ka 44 minit.
Ha ka jingïakhun kaba ar ka kynhun jong ka R. Shkenshynriah SC kala khur namjop da kaba pynliem 2-0 kol ïa ka R.Iawpynsing SC.
Ka R.Shkenshynriah SC ka thep nyngkong lyngba u Hikaidame Bareh haka minit ba 45+1 bud sa ka kol ba ar na u Obadaia Bareh haka minit ba 86.
Ka jingïakhun lahshai ka sngi (14 tarik Naiwieng, 2023) kan long hapdeng ka Khliehriat West YWSC pyrshah ïa ka Thangskai Tiger SC nangta ka jingïakhun kaba ar hapdeng ka Dhana SC pyrshah ïa ka Moolamanoh SC.
