Tyrwa u Bah Robert Kharjahrin ïa ka RDA ban long u kyrtong monlang ha ka elekshon MP

By Mawphor News Desk On Nov 12, 2023

Shillong, Naiwieng, 11: U Bah Robert June Kharjahrin uba la shakri la 20 snem kynthih kum u dkhot sengbhalang kata kum u dkhot barim jong ka Khasi Students Union (KSU) bad kum u nongïalam ba la shongthait jong ka Hynñiewtrep Youths Council (HYC) ha ka sngi Saitjaiñ u la pynbna ba u dang don ka jingangnud ban bteng ïa ka jingshakri jong u ïa ka ri bad ka jaidbynriew lyngba ka sain hima sima.
Ha ka jingïakren bad ki lad pathai khubor hadien ka jingshah pynkup burom ha ka sngi ba la pynskhem ïa ki nongkitkam ba thymmai jong ka Hynñiewtrep Youths Council (HYC), u Bah Robert June Kharjahrin ula ong, “lada ki nongïalam jong ki seng saiñpyrthei ki ibit ïa nga, nga la long uba la pynkhreh ban ïakhun ïa ka elekshon MP.”
Haba kylli, u la ong, “ha ka jingim jong nga, nga kham snoh sha ki Regional Party bad haba ngi pyrkhat ïa ki Regional Party, ka UDP bad ka HSPDP ki dei ki sengriewlum kiba la slem bad kiba la ïoh jingieid bad ïoh jingshaniah na ki paidbah bad kiba la noh ïa u synñiang u bynhei sha ka Bri u Hynñiewtrep bad sha ka jylla baroh kawei.”
“Ngan tyrwa ïalade ban ïakhun na ka Regional Democratic Alliance (RDA) bad kata pat ka shong ha ka jingibit bad ka shong ha ka jingïasngewthuh jingmut lang jong ki nongïalam. Lada ha kano kano ka dur ruh, u synñiang u bynhei jong nga nangne shakhmat ngan shakri ïa ka ri bad ka jaidbynriew katba lah ei ngan noh lyngba ka sain hima sima,” ula ong.
Dang shen ka Regional Democratic Alliance (RDA) kaba la pynthymmai ïa ki nongïalam ba kynthup ïa u Bah Metbah Lyngdoh uba long u President ka UDP kum u Chairman bad u President ka HSPDP kum u Secretary ki la shim ïa ka rai ban ïakynduh biang sa shisien ban pyrkhat ha kaba ïadei bad u kyrtong monlang ban pynïakhun ïa ka elekshon MP sha Lok Sabha na Shilong Parliament Constituency ka ban sa long ha u snem 2024.
Da kaba pynpaw ïa ka nongrim kaba la pynlong ïa u ban rung sha ka jylli jong ka saiñpyrthei, u Bah Kharjahrin u la ong, “kum u rangbah uba don ïa kata ka jingkitkhlieh bad kum u khun jong ka Bri u Hynñiewtrep uba thrang shisha ban ïohi ba ka jaidbynriew jong ngi kan don hapdeng kata ka jingïada kaba biang bad ngin don hapdeng kita ki jingkiew irat ha ki liang baroh nga la rai ban ïasnohkti ban ïashim bynta ha ka sainhima sima. Nga ngeit skhem ba lyngba ka saiñhima sima ngin sa lah ban bteng ïa ka mishon kaba ngi la don ha ka mynsiem bad nga ngeit skhem ba ka jaidbynriew Hynñiewtrep kan ai ïa ka kti ka mon kti ka diang kaba ngin lah ban pynurlong ïa ki mat ki jura kiba ka jaidbynriew jong ngi bad ka jylla ka la angnud la slem bah,” u la bynrap.
“Halor u pud u sam ngim lah ban len ba ngi donkam ïa ka jingpynbeit ïa ka North East Organisation Act bad ïa ka Sixth Schedule, ka jingdawa ban pynrung ïa ka ktien Khasi ha ka khyrnit Baphra, ka jingdawa ban wanrah ïa ka roi ka par ha ki liang baroh bad kum ka jylla jong ngi ngi donkam shibun na ka Sorkar India bad dei na kane ka daw ba ka la don ha ka jingmut ba ngan tyrwa ïalade ba ngan ïakhun ïa ka elekshon MP,”ula ong.
“Kumba nga la pynïasoh ïalade bad ki kynhun Sengbhalang nga don tang kawei ka thong ban ïakhun na ka bynta ban ïada ïa ka ri bad ka jaidbynriew jong ngi pyrshah ïa ki nongshun kiba nabar bad bapoh jong ka jylla. Nga don ka jingangnud ban pynneh pynsah ïa ka jinglong bakyrpang jong ka jaidbynriew bad kumjuh ban kyntiew ïa ka jaidbynriew Hynniewtrep ka jylla ha ki liang baroh,” ula ong.
“Da kata ka jingangnud bad da kata ka jingthrang ka la pynlong ïa nga ban neh ha ka kynhun sengbhalang la jan dap 20 snem nga la leh ha la ibor iba rit ban noh synñiang lyngba ka sengbhalang bad nga dang sngewthuh biang biang ba ki dang don shibun ki mat ki jura ïa kiba ngim pat lah lehse ban pynurlong ha kane ka kynti hynrei ka jaidbynriew ka donkam pat ïa ka jingïada da ka Inner Line Permit (ILP), ïa ka khyndew ka shyiap, ïa u pud u samla, ka jingpynrung ïa ka ktien Khasi ha ka Khyrnit Baphra bad kiwei pat ki mat ki jura kiba dang donkam shisha kum ka jaidbyniew jong ngi,” u la bynrap.
Haba kynthoh ba ki MP kiba la mihkhmat ïa ka Shillong Parliamentary Constituency kim shym la lah satia ban pynurlong wat tang ïa kawei ruh ka mat jingdawa na ka Sorkar India, u Bah Kharjahrin u la ong, “ngi dei ban wad ïa ki lad ki lynti kumno ban pynbor ïa ka Sorkar India ba kan ai ha ngi ïa kita ki jngdawa jong ngi. Ha kine ki snem kiba ladep, ngin ym lah ban len ba kita ki nongmihkhmat ïa ka jaidbynriew Hynñ iewtrep bad ïa ka jylla Meghalaya kim shym la lah ban pynurlong ïa ki mat ki jura.”