Shillong, Naiwieng, 11: Shi sngi hadien ba ka Ingbishar Meghalaya High Court ka la bthah ban pynjulor noh ïa u drok ba la ïoh kurup na kylleng ki bynta jong ka Bri u Hynñiewtrep, ki dkhot jong ka Federation of Khasi Jaiñtia and Garo People (FKJGP), Shillong City ha ka por kumba 8:45 baje eiei mynmiet jong ka sngi Thohdieng ki la bat ïa uwei u briew halor ka jingsuba ba u dei u nongkhaii drok harum ka parking Lot jong ka MUDA ha Khyndai Lad, Shillong.
Ki dkhot ka seng hapoh ka jingïalam jong u Assistant Education Secretary u Bah Bonny Jyrwa bad u General Secretary u Bah Shane Nongrum ki la ïoh ban bat ïa une u bar jylla shadien jong ka jaka pynieng kali ka MUDA ha Khyndai Lad.
Tang shu ïoh bat ïa une u suba nongdie drok, ki dkhot ka FKJGP ki la leit ban aiti sha ki Pulit jong ka Sadar Police Station bad hadien katto katne por ba la wan poi sha ki pulit jong ka Anti- Narcotic Task Force ka East Khasi Hills ban talasi ïa une uba la sub nongkhaii drok.
Ha ka jingtalasi ïa ka met jong une u nongkhaii drok, ki Pulit la ïoh ban kurup ar tylli ki tin golden ba la thep ïa u drok Herion, 33 tylli ki tyndong plastik barit ba la thep ïa u drok Herion, ar tylli ki thyrnia injek, ar tylli ki mobile phone, ka pisa Bangla kaba 10 tyngka, ka pisa kot T. 615 spah bad T. 95 tyngka ki pisa khutia.
U Bah Boney Jyrwa, ha ka jingïakren bad u nongthoh khubor u la ïathuh, katba u dang mih na jaka pynieng kali ha MUDA u la ïohi ïa u nongkhaii drok. “Nga la kren ïa u namarba nga la i suba bad nga la ïohi ba u bat ha kti u powdar rong stem bad mar mar nga la pyntip noh sha u President jong ka FKJGP Shillong City.”
U la ïathuh ba une u suba nongkhaii drok u dei u bar jylla Bengalee. Uwei na ki dkhot ka seng u la ong, “ha ka por ba ngi la bat ïa u (suba nongdie drok) u la tyrwa ïa ngi da ka pisa. Hynrei kum ki dkhot ka seng ngim shym la shim ïa kata ka pisa (kaba u tyrwa) hynrei lada ngi shim ïa kata ka pisa, ka jaidbynriew patde ka lah jot.”
Haba kylli, u Bah Boney Jyrwa u la ong, “u (suba nongdie drok) la tyrwa ïa ngi da ka pisa 50 hajar, shilak eiei hynrei ngim shym la ngeit satia bad ngi la rah beit ïa u sha Sadar Police Station.”
