Shillong, Naiwieng 10: Khnang ban ïa ïaid ryngkat lang bad kiwei ki Jylla ka Ri India bad kumjuh ruh bad kiwei ki Ri ha satlak ka Pyrthei, ka sorkar pdeng ka la ïai ai jingmut ïa ka sorkar Meghalaya ban wad ki lad lynti kumno ban pyndonkam noh da ki bor ki ban ïai neh beit ban pynmih bording ym shuh ban shaniah beit tang ha ka um hynrei ban pyrshang lyngba ka bor Sngi (Solar), ka bor Lyer (Wind) bad dewiong (Thermal).
Lah ban kdew ba kiwei ki ri kum ka Germany, Japan bad Australia ki ïai pyndonkam da kine ki bor ban pynmih bording nalor ki Dam bad kane ka pynlong ïa kine ki Ri ban riew spah ban die ïa ki bording sha kiwei pat ki Ri ka pyrthei.
Kum shi bynta ban pynkhlaiñ ïa ki lad ban pynmih bording, ka sorkar pdeng lyngba ka tnat Ministry of Power ka la lum ka jingïalang jong ka National Conference of Power and Renewable Energy kaba la long naduh 6-7 tarik Naiwieng ha Bharat Mandapam New Delhi.
Haba kren sha ki lad pathai khubor u Myntri ka tnat bording ka Meghalaya u A.T Mondal ula ïathuh ba ha kine ki sngi kala sdang kiew ka jingdawa pyndonkam bording hapoh ka Jylla bad ula pynsngew ruh ïa kane haka National Conference.
U Mondal ula ïathuh ba haka jingïalang jong ka National Conference u Myntri ka tnat bording ka sorkar pdeng u R.K Singh ula kyntu ïa ki Myntri ka tnat bording ki sorkar Jylla ban phai khmat sha ki rukom pynmih bording lyngba ka bor Sngi (Solar), ka bor Lyer (Wind) bad dewiong (Thermal) namar kine kin ïaineh baroh shi junom.
Haba ïadei bad ka jingkyntu ka sorkar pdeng ban ban phai khmat sha ki rukom pynmih bording lyngba ka bor sngi, ka bor lyer bad Thermal, u Myntri ka tnat bording ka Meghalaya u A.T Mondal ula ïathuh ba ula pynsgew sha u Myntri ka sorkar pdeng haba ïadei bad ka jingeh ka Meghalaya ban phai khmat sha kine ki rukom pynmih bording lyngba ka bor sngi , ka bor lyer bad Thermal.
“Haka jingïalang jong ka National Conference ha New Delhi, nga la kyntu ïaka sorkar pdeng ban tei da ka Institute ha Shillong ban ïarap ïaki sorkar ki jylla ka thaiñ shathei lammihngi (North East) ban ïaphylliew jingmut, haba ïadei bad ki sienjam ban shim na ka bynta ban sdang phai khmat sha ki rukom pynmih bording lyngba ka bor sngi , ka bor lyer bad Thermal” la ong u Mondal.
U Mondal ula kubur ba ka jingpyntrei ïaki jingtei ban pynmih bording lyngba ka bor sngi , ka bor lyer bad Thermal kam dei kaba suk bad kine ki Project ki dei kiba rem bha bad dei namar kane, ki sorkar jylla ka thaiñ shathei lammihngi (North East) ki la kyntu ruh ïa ka sorkar pdeng ban ïarap pisa ïa ki sorkar jylla.
Haba kylli halor ka rai jong ka sorkar pdeng, u Mondal ula ong “Naka liang u Myntri ka tnat bording ka sorkar pdeng u R.K Singh ula kular ban eksamin ïaki jingdawa ki sorkar jylla ka thaiñ shathei lammihngi (North East) bad shen un sa lum biang ïaka National Conference ban ai jingmut kumno ban ïaid shakhmat”.
