Shillong, Naiwieng 12: Ka BBS College ka la ïohrah ïa ka namlahduh ha ka lympung ïalehkai NEHU Inter College Cricket (Men) Tournament 2023 bad kane ka la wan hadien ba ka la pynliem ïa ka St. Anthony’s College ha ka jingïakhun final hynnin ka Sngi Saitjaiñ kaba la pynïakhun ha NEHU Permanent Campus, Shillong.
Haba phai sha kane ka jingïakhun, ka St. Anthony’s College ka la jop ïa ka jingkynting pisa (toss) bad ka la jied ban bol nyngkong. Haba shim ïa ka pali ban sdang tied nyngkong, ka BBS College ka la buh ïa ka thong da 164 ron haduh kaba kut jong ka 20 over bad shah pynhap 9 wicket.
Haba beh ïa ka 165 ron, ki rangïalehkai ka St. Anthony’s College, Shillong kim shym la lah ban kynjoh ïa ka thong ba la buh bad ïohlad ban kynjoh tang sha ka 141 ron haduh kaba kut jong ka 20 over hadien ba duh 7 wicket. Lyngba kane, ka BBS College ka la khur ïa ka namjop da 23 ron bad kylla long ka lahduh jong kane ka lympung.
ïa kane ka lympung la pynhap pyrda noh ha ryngkat ka jingkren lyngkot na u Prof. K. Debberma, Dean, School of Social Science, NEHU u ba la wan kum u kongsan bad ruh ban sam ïa ki khusnam sha ki nongjop.
Kiwei pat kiba la don ryngkat ha kane ka sngi pynhap pyrda ki kynthup ïa u N. Das, Asst. Director (PE &; Sports), NEHU cum Organizing Secretary bad Principal jong ka BBS College, Shillong .
Nalor ka khusnam sha ka kynhun ba rah namlahduh la ïoh ruh ban sam khusnam sha ki rangïalehkai kiba la seisoh ha katei ka jingïakhun final ha kaba u Pawan Kumar jong ka BBS College u la ïoh khur ïa ka khusnam rangïalehkai ba kynsai jong ka jingïakhun final lane Man of the Match, katba u Rohit Yadav jong ka St. Anthony’s College u la khur ïa ka khusnam ‘Rangïalehkai ba kynsai tam ha kane ka lympung’ lane Man of the Tournament.
