Shillong, Naiwieng 12: Nalor ki lai kynhun ba kynthup ïa ka MLP FT, PFR FA, bad ka Mylliem Lum SC, bud sa ka Nongkseh SC kum ka kynhun ba saw ban rung sha ka semi final jong ka lympung SSA 3rd DIVISION Football League 2023.
Ka Nongkseh SC ka la ïoh ban buh jaka ïalade ban ïakhun ha ka semi final dei hadien ba ka la pynkhyllem noh ïa ka Tynring SC ha ka jingïakhun Quarter Final kaba la long hynnin ka Sngi Saitjaiñ ha madan 1st Ground SSA Stadium.
Haba phai sha ka jingïalehkai ka Tynring SC ka la shah pynjemkhnap ha kaba ka la shah pynbam haduh 0 – 5 kol hakhmat ka Nongkseh SC.
Ka Nongkseh SC ka la sdang pynkhihjar tang khyndiat minit ba la sdang ka jingïakhun na u Rishan Mylliemumlong (5 minit) bud sa ka kol kaba ar na u Albert Nongsiej (34 min), nangta ka kol kaba lai na u Samphrangshai Rani ha ka 47 minit kaba la pynthikna namjop.
Wat hadien ba ka kynhun ka la lamkhmat haduh lai kol ha kane ka jingïakhun, hynrei kam shym la shongthait bad dei ha ka minit ba 65 & 68 ba u Tony Syngkli u la khyrwit sa ar kol ban khylliap ïa ka jingïakhun kum ka nongjop bad ruh ban bteng ïa ka lynti ïaid sha ka semi final.
