Shillong, Nailar 14 : Kiba bun ki MDC wat hapdeng ka jingartatien hynrei ki pynpaw pat ba ki long beit kiba la pynkhreh lada ka elekshon MDC ka wan ha u snem 2024 lane wat ha u snem 2025 ruh.
Katei ka jingkren jong ki kadei hadien ba ka la don ka jingtyrwa ban pynbun noh ïa ka jingdon ki MDC ha ki District Council kiba don ha ka jylla hadien ba ka la don ka jingtyrwa ban pynkylla ïa ka Khyrnit kaba Hynriew jong ka Riti Synshar jong ka Ri.
Haba ïoh ban ïa kren bad katto katne ki MDC (ki bym pat kwah ba pynpaw kyrteng) ki la ïathuh ba kum ki nongmihkhmat paidbah ki la hap ban pynkhreh lypa na bynta ka elekshon lada ka wan ne kam wan ha u snem 2024 ruh.
“Ïa mynta hi ngi hap ban ïai ap shwa haduh ban da dep ka Dorbar Tlang ha Parliament bad tang hadien kata hi ngin sa lah ban tip kumno kan long. Tangba ngi hap pat ban long kiba la pynkhreh lypa,” ong uwei na ki MDC.
Katkum ka jingong jong u, lada ka Parliament ka pdiang ïa katei ka jingtyrwa ban pynbun ïa ka jingdon ki MDC ha ka jylla kan sa bud pat sa ka jingphiah thymmai ïa ki constituency kumta kane kan shimpor bad kan shem jingeh bha ban ïoh pynlong ïa ka elekshon kumba ka dei ha u Rymphang – Lber jong u 2024.
Uwei pat u MDC u la ong, “Na bynta jongngi kam da ïapher than eh lada long ha u snem ban wan lane kham hadien ruh namar khatduh dei u paidbah ba rai katkum ki kam ba ngi trei ha ka samoi kum ki nongmihkhmat.”
Lah ruh ban kdew hangne ba dang ha ka taiew ba la dep u Myntri Rangbah ka jylla u Conrad K Sangma u la leit ban kynduh ïa u Myntri Rangbahduh ka Ri, u Narendra Modi ha nongbah Delhi ban ïa kren halor ka ILP bad kumjuh ruh haba ïadei bad katei ka bynta. Ha katei ka jingïakynduh u Myntri Rangbah u la ïatai ruh halor ka jingdonkam ban kyntiew noh ïa ka jingdon ki MDC ha KHADC na ka 30 sha ka 40 ngut, kata 36 ngut kiba shu jied bad saw ngut kiba shu thung, katba ha GHADC na ka 30 ngut sha ka 42 ngut ha kaba 36 ngut kin dei kiba shu jied da u paidbah bad hynriew ngut pat kiba shu thung.
Ha kajuh ka por haba ïadei pat bad ka JHADC kaba la tyrwa ban kyntiew na 30 sha ka 34 ngut ha kaba 30 kiban shu jied da u paidbah bad saw ngut pat kiban shu thung. Hynrei u la ong pat ba katkum ka jingïohi jong ka jylal na bynta katei ka council ka jingkyntiew ïa ka jingpynbun ïa ki MDC kadei ban long sha ka 32 ngut, kata katkum ka jingdon ki nongshong shnong lada ïa nujor bad ka KHADC bad GHADC.
Dang shen u CEM ka KHADC, Bah Pynïaid Sing Syiem u la pynpaw ruh ba ka elekshon kan long beit ha u snem 2024 namar haduh mynta na ka liang ka sorkar pdeng kam pat phah jingthoh ei ei sha ka Council ban pynjlan ïa ka rta treikam jong ka Iing Dorbar ba mynta.
Lada dei ba ka elekshon MDC kan long ha u Rymphang – Lber mynta u snem, ki MDC bad kumjuh ki kyrtong MDC ki don por sa tang kumba 6 bnai ei ei ban pynkhreh na bynta katei ka elekshon.
