Naduh 12 tarik Risaw yn sdang ki tamasa ban khring ïa ki nongwan jngohkai sha Meghalaya

Shillong Nailar 14: Ka jylla Meghalaya ka la pynkhreh ban pynlong ïa ki tamasa bapher bapher ki ban sdang naduh ka 12 tarik u Risaw da ka jingthmu ban kyntiew ïa ka kam jngohkai ha ka jylla baroh kawei da kaba khring ïa ki nongwan jngohkai na kylleng ka pyrthei ban wan sha kine ki tamasa.
Haba pynbna ïa kane, mynta ka Lah Sngi U Blei da u Myntri ka tnad Jngohkai u Bah Paul Lyngdoh ula ong “Ki tamasa bapher bapher yn sa pynlong ha kylleng ki bynta jong ka jylla ban rah shajrong ïa ka dur ka dar jong ka jylla Meghalaya kum kata ka jaka kaba biang tam hapoh ka ri na ka bynta ki nongjngohkai pyrthei”.
Yn sdang ïa kane ka tamasa da kaba pynlong ïa ka Megha Kayak Fest kaba lai sngi naduh 12 tarik haduh 14 tarik u Risaw ha Shnong Umtham, Ri Bhoi District hadien kane yn pynlong ïa ka Shillong Literary Festival kaba lai sngi ha nongbah Shillong naduh ka 14 haduh 16 tarik u Naiwieng.
U Bah Paul Lyngdoh ula ong ba ïa ka Shillong Cherry Blossom Festival, kaba dei ka tamasa kaba khring bha ïa ki paidbah ha ki snem ba la dep, yn pynlong ha ka 17 haduh 19 tarik u Naiwieng bad mynta ka kynti ïa kane ka tamasa yn pynlong ha Ri Bhoi district.
Ha u snem ba la dep, ïa katei ka tamasa la hap ban pynsangeh noh namar ka jingdon ka jingjia ha ka shnong Mukroh ha kaba 6 ngut ki briew kila shah siat iap ha kaba 5 ngut ki dei na Meghalaya bad uwei u Forest Guard ka Assam.
Namar ka jingpynsangeh noh ïa katei ka tamasa, u Nongpynïaid ia katei ka tamasa u Bah Jason Manner ula ïathuh ba ki la dep ban die ïa ki 12000 tylli ki tiket ha ka shi sngi bad la khmih lynti ba kin don haduh palat 60,000 ngut ki briew kiban wan sha ka jylla.
“Ngi la dep ban pynphai biang ïa ka pisa kaba kot T.1.25 Klur sha ki paidbah kiba la thied ïa ki tiket bad ngi la lah ban pyndep lut ïa kane ha u bnai Kyllalyngkot mynta u snem bad ka jingduhnong ki nongpynïaid ïa katei ka tamasa kala kot sha ka T.3.6 Klur namar ka jingpynsangeh noh ïa ka tamasa” ong u Bah Jason.
“Mynta u snem, ngi buhthong ba kin don haduh 90,000 ngut ki briew ki ban wan sha ka Cherry Blossom Festival” ula ong.
Halor ka jingkylli ba bun ki kynthoh jur ban pynlong ïa ki tamasa, u Myntri Sorkar ula ong, ba ki nongkynthoh kin don beit ha man la ki jaka hynrei ïa ka jylla Meghalaya la tip ruh kum ka Music Capital jong ka ri.
“Ha ka jingshisha, bun ki nongtem nongrwai ki shem jingeh ban kamai jakpoh namar ka jingduna palat ki lad, mynta ngi la ai ïa katei ka rynsan jong ka jingailad bad jingmyntoi bad kane kan ym leit tang sha ki kynhun kiba pynlong ïa ka tamasa ne ki nongrwai ne nongtem kiba ïashim bynta ha katei ka rynsan hynrei kin don ruh bun ki ban ïoh jingmyntoi lyngba kitei ki tamasa” ong u Bah Paul.
“Kumta kan don beit ka jaka na ka bynta ban pynbha shuh shuh bad ka don ruh ka jingduna ha kaba ïadei bad ka jingdawa bad ka jingpynbiang bad kane kadei ka jaka kaba ngi ïaleh ban pynbha, ngi ïaleh ban ïai pule bad ngin sa lah ban kyntiew ha ka ban pynbiang ïa ki jingdonkam kiba ngi lah don lypa” ula ong.
“Ngi don ruh ïa ki surok kiba long shi bynta jong ka projek kaba ïadon bynta bad ka kam jngohkai hynrei kine ki dei thik tang ki surok kiba pynïasoh ne kiba don ïa ka lad ban bynrap ban kyntiew ïa ka kam jngohkai” ong u Bah Paul bad ka bynrap ba ym treh ban kren eiei pat ha kaba ïadei bad ka rukom treikam jong ka tnad PWD (Roads) halor ka jingdon jongki surok kiba sniew.
U Myntri Sorkar ula pyntip ruh ba ha kaba sdang jong u snem ban wan, kin don ki prokram kiba man la ka por ha Soso Tham Auditorium bad ha Lariti ne ïa kaba mynshwa la tip kum ka SICPAC.
“Namar ba ka la don ka jingdawa na ki briew kiba wan kai, ngin sa pynlong ïa ki prokram kiba man la ka por ha Soso Tham Auditorium ïa kaba yn pynlong da ka tnad Arts and Culture ryngkat ka jingkyrshan jong ka tnad jngohkai bad ka baar, ngi don ïa ka Lariti ïa kaba nga la leit ban jurip ha ka taiew kaba la dep bad mynta ngi lah long kiba la pynkhreh ban plie noh bad ban sdang ïa ka jingshakri bad ban pyndonkam noh ïa ki 3 tylli ki Theatre bad ha u snem ban wan ngin sa pynlong ïa ki prokram bapher bapher” la ong u Myntri Sorkar.
Sa kiwei pat ki tamasa ki ban sa pynlong ki kynthup ïa ka Me.Gong Festival, ka Winter Tales Festival bad ïa ki tarik na ka bynta kine ki festival yn sa pynbna kham hadien.