Shillong, Nailar 14: Ka Tnad Social Welfare ka la shim ïa ka rai ban pynmih bad thung briew sa 14 tylli ki Post ban pynthikna ka jingtreikam ka biang, kan khlaiñ bad ïaid ryntih ha ka Child Helpline Service jongka jylla Meghalaya.
U Myntri ka tnad Social Welfare u Bah Paul Lyngdoh haba ïakren bad ki nongthoh khubor mynta ka Lah Sngi U Blei, ula ong, “Nga dap da ka jingkmen ban pynbna ba ngi la lah ban pynkhlaiñ ïa ka Child Helpline Service (1098) da kaba mang ban pynmih bad thung briew sa 14 tylli ki Post, ka ban ïarap ha ka ban pynïaid ryntih ïa katei ka jingai jingshakri”.
Ula iathuh ba ïa ka Child Helpline Service la khmih bad peit tang da iwei I Child Helpline Administrator.
“Kadei ka jingjop kaba khraw ïa ka tnad namar ba ïa katei ka jingai jingshakri la pyntreikam biang ha u snem 2019 tang da iwei I nongtrei bad phi lah ban mutdur ïa ka jingjop ha ka rukom ai jingshakri” ong u Myntri Sorkar.
Ki 14 tylli ki Post kiba thymmai ki kynthup 1 IT Supervisor, 10 ngut ki Call Operator, 1 Nongtrei ban trei bun jait ki kam bad 2 ngut ki Security Guard.
“Mynta haba ngi lah don 10 ngut ki call operator, ka mut ba ka rukom ai jingshakri kan sted bha bad lada don kino kino ki jingujor ki lah ban poi kloi sha kine ki Call Operator bad lyngba kane, ngin lah shisha ban ïarap ha ka lynti kaba biang bha ïa kito kiba don hapdeng ka jingeh bad jingshem lanot” ong u Bah Paul.
U Bah Paul ula ïathuh ruh ba ka tnad sorkar ka la pyntreikam biang ïa ka Women Helpline ‘181’.
“Nga kyntu ïa phi ba phin ïa leit khmih khnang ïa ka ophis treikam jongka Directorate, namar ngi lah dep ban buh ïa ki tiar ki tar kiba thymmai bad ïa ki kor ki bor ki ban ïarap ha ka ban lapdien ïa ki ‘Call’ kiba ngi ïohpdiang bad ban lapdien ruh ïa ka Response System bad ka don ruh ka Website kaba la dep ban pyntreikam biang ban pynthikna ban lah ban ai ïa ka jingshakri kaba bha tam” la pynkut u Myntri Sorkar.
