Subroto Mukherjee Cup 2023: Bteng jingjop ka ïewrynghep, yn aireng ïa ka Umphyrnai ha ka semi

Madan Heh-Mawlai, Jylliew 28: Ka kynhun ïalehkai kynjatbol jong ki khynnah Under 14 ka skul ïewrynghep Sec. School ka la bteng biang ïa ka jingïaidlynti jong ka da ka namjop sa shisien pyrshah ïa ki khynnah lehkai ka skul OM Roy Memorial Hr Sec. School ban jam sha ka semi final jong ka Subroto Mukherjee Cup 2023.
Ha kane ka jingïaknieh rung semi final hapdeng ka ïewrynghep Sec. School pyrshah ïa ka OM Roy Memorial Hr Sec. School ka ba la long ha Madan Heh, ha Mawlai, ka la kut ha kaba ym shym la don ba lah ban pynkhihjar kaba la ïalam ïa kine ki ar kynhun ban jam sha ka jingïashut penalty ban rai ïa ka namjop.
Dei hangne ba ki khynnah skul ka ïewrynghep Sec. School ki la lah ban pynkhyllem noh ïa ka OM Roy Memorial Hr Sec. School hadien ba ki la jop da 4-2 ha ka jingïashut ïa ka tie breaker.
Da kane ka namjop, ki khynnah skul jong ka ïewrynghep Sec. School kiba mih madan ha ka kyrdan ïakhun Under-14 ki la ïoh ban bteng ïa ka lynti ïaid ka jong ki sha ka semi final jong ka lympung Subroto Mukherjee Cup 2023.
Ki khynnah lehkai jong ka ïewrynghep Sec. School kin sa bteng ïa ka lynti ïaid jong ki ha ka semi final pyrshah ïa ka Umphyrnai Presbyterian School bad ka jingïakhun kan long lashai ka sngi, kata ka 29 tarik, ka jaka kan long ha Madan Heh, Mawlai ha ka por 11 baje mynstep. Ka jingïakhun kaba nyngkong ha ka por 10 baje mynstep kan long hapdeng ki khynnah lehkai jong ka skul Sacred Hearts Boys HSS, Mawlai pyrshah ïa ka Assam Rifle P. School bad ka jaka kan long ha Madan Heh, Mawlai, ynda la kut kane yn sa ïoh ban sdang sa ka jingïalehkai hapdeng ka ïewrynghep pyrshah ïa ka Umphyrnai.