Shillong, Jylliew 27: Ka ïingbishar ba pura ne ka full bench jong ka High Court of Meghalaya, mynta ka sngi ka la shim bishar halor ka jingujor ba u dewïong ba tih beaiñ u poi sha ki Coke Factory beaiñ kiba don khamtam ha Shahlang.
Ka ïingbishar kaba kynthup ïa u Chief Justice u Sanjib Banerjee, u Justice W. Diengdoh bad u Justice HS Thangkhiew ka la shim bishar ban kyntu ruh ïa ki nongujor ban wad bniah ïa ka jingïadon bynta ki Pulit jong ka Shahlang halor kane ka jingïohlad ki trok kit dewïong beaiñ ban pynpoi ïa une u dewïong sha kiba bun ki Coke Factory ha Shahlang.
Ka ïingbishar ka la ong ruh ba u nongujor, uwei u Monu Kumar, u la ujor sha ïingbishar dei namar ba la ailad ïa ki Coke Factory ba kin treikam ha West Khasi Hills khlem da ïoh jingbit satia. Na ka liang ka jingbishar ka la bthah ïa u Monu Kumar ban wad ïa ki briew kiba kham hakhmat kiba donkti bad kane ka jingkhaïi ïa u dewïong sha ki Coke Factory.
Shuh shuh ka ïingbishar ka ong ba dei ban pyntip ruh sha u Justice BP Katekey, ba la thung da ka Supreme Court ban tohkit halor ka jingtih bad khaïi dewïong beaiñ ba un tip ruh halor kane ka jingkhaï dewïong beaiñ sha kine ki Coke Factor khamtam ha Shahlang. La bthah ruh ban dei ban peit ka jingbym shimkhia ne ka jingleh sting ki bor sorkar bad ki Pulit halor kane ka bynta, khamtam eh ïa u Officer Incarge jong ka Shahlang Police Station.
Ka ïingbishar ka la kynthah tyngeh ruh ïa ka sorkar jylla kaba borabor ka ju ong ba kane ka kam khaïi beaiñ kan sa nang jah katba nang ïaid ka por, hynrei ha ka jingshisha ha kaba ïadei bad ka jingtih dewïong beaiñ kam ju poi shano shano ruh.
Ka jingtian bishar la buh ba kan long ha ka 3 tarik u bnai ban wan.
