Shillong, Naitung 28: Ka Umrynjah SC bad ka Laitkroh SC ki la jop ïa ki jingïakhun pre-quarter final jong ki lyngba ka penalty ha ka lympung lehkai jong ka Shillong Sports Association U-20 Fourth Division 2024 ha SSA Ground, Polo ha ka Sngi Saitjaiñ.
Na ka liang jong ka Umrynjah ka la pynliem ïa ka Thynroit SC da 7-6 ha ka jingïashut tie breaker hadien ba ïakhaid da mar 1-1 kol ha ka por ba la buh, katba ka Laitkroh ka la jop da 4-2 ha ka tie breaker pyrshah ïa ka New Challenger SC naba ïakhaid da mar 2-2 kol ha ka jingïalehkai.
Haba phai sha ka jingïakhun kaba nyngkong, ka Umrynjah ka la ïoh ban lamkhmat nyngkong ïa ka jingïalehkai lyngba ka kol na u Mihsalan Kharjana (4′ minit) hynrei u Cleofast Kshiar (68′ minit) u la pynïakhaid noh na bynta ka Thynroit shuwa ban shah rem ha ka tie breaker.
Nangta ka jingïakhun kaba bud, la skahi ïa ka New Challenger kaba la lamkhmat nyngkong na ka kol u Lamiki Mukhim ha ka minit ba 27, hynrei kane kam shym la neh slem naba ka Laitkroh ka la pynïakhaid ha ka kylla miet lyngba u Rishailang Myrthong (40′ minit).
Ka jingïalehkai ka la nang itynnat shuh shuh hadien ba ka Laitkroh lyngba u Robin Kurkalang (51′ minit) ka la ïoh ban lamkhmat kylla ïa ka jingïakhun.
Satang khyndiat por shuwa ban kut ka New Challenger ka la jubab da kaba pynïakhaid lyngba u Yesterroi Nongkynrih (70′ minit) ban rah ïa ka rai nongjop sha ka tie breaker shuwa ban shah khyllem.
Lah ban kdew ba ka Thynroit ka la ïoh rung sha ka wat ïakhun Pre Quarter hadien ba bat kyrdan ba nyngkong na ka Group A, katba ka Umrynjah ka dei ka kynhun kyrdan ba lai (na kajuh ka Group A). Baroh ar tylli ki kynhun ryngkat bad ka Madanrting SC (kyrdan ba ar) ki la ïoh ban khur mar 8 point.
Katba ha kawei pat ka liang, ka Laitkroh, ka dei ka lahduh na ka Group D, katba ka New Challenger ka wan kyrdan ba lai na ka Group B.
Ki jingïakhun mynta ka sngi, yn sakhi ïa ka lahduh jong ka Group B – ka Umiew Maw U Sam SC ka ban aireng ïa ka kynhun kyrdan ba lai jong ka Group D – ka Pynthorbah SC ha ka por 1:30 baje mynsngi. Nangta ka lahduh jong ka Group E – ka Nongkolew SC kan aireng ïa ka kynhun kyrdan ba lai jong ka Group C – ka Mawlynrei SC ha ka por 4 baje nohphaisngi. Baroh ar ki jingïalehkai yn pynlong ha madan First Ground.
